EDITORYAL - Ang utang kabubot-on

Sa atong panahon, tingali madatu ka man o ma pobre, way ni bisan kinsa kanato ang wala’y utang. Hasta kadtong gipanamkon pa, utangan na kay maapil sa pagbayad tungod sa kadaku sa utang sa atong nasud.Unsa ba kining utang? Usa kini ka obligasyon nga pagabayran sulod sa gitagal nga impason. Utang kini nga may numero o kantidad nga tulobagon nato kining pagabayaran.

Ngano mangutang pa man ang datu nga daghan man sila’g kwarta? Tinuod kana, pero may lain silang gamitan o problema kun unsaon nga mosamot ang kadatu. Lahi sa pobre mangutang kay ibayad man sa utang, aron lang mabuhi. Sagad di pa kaimpas,utang na pod hangtud modaku nga maugtas ug maglisod na sa pabayad. Nga usahay aron matabla ipaagi nalang og paligasay.

Sa laing bahin, adunay utang nga way kantidad nga mao ang utang kabubut-on. Ang pagbayad niini way katumbas nga bahandi aron kini mabayaran.

Magpabilin kining tulubagon nga atong bayaran sa tibuok kinabuhi kay garantiya niini mao man ang atong pagkatawo.Adunay patong nga interes kini nga kinahanglan nga may kredibilidad ipakita ang kamatinud-anon sa pagbayad ini.

Apan unsaon man ang hingpit nga pagbayad sa utang kabubut-on- nga malipay ang atong giutangan? Unang buhaton mo mao ang pag-ila sa imong kaugalingon nga ikaw utangan og kabubut-on, ngadto sa kahitas-an nga maoy naghatag kanato og kinabuhi. Sa atong ginikanan nga maoy nag-amuma sa atong pagkatawo. Sa mga suod nga higala, nga katabang sa pagkab-ot sa imong pangandoy. Sa mga kahigayonan, nga karon imong natagamtaman sa kinabuhi.

Mapahitas-on ang tawo nga di kamao moila og utang kabubut-on. Wa siya kaamgo sa iyang kahimtang nga may kinabuhi pa siya. Angay mapalandong ngano unsay hinungdan sa paghimo sa Dios kanato nga mabuot nga tawo. Kini tungod kay gusto Niya nga may tulobagon kita nga alagaron Siya. Ang pagsunod kanunay sa maayong kabubut-on sa Dios, kini maoy tiunay nga pag-ila kaniya.

Ang paghimo mo usab niini ngadto sa isig katawo, mao usab ang pag-ila sa mga tawo nga may utang kang kabubut-on, pinaagi nga imo usab ubanan sa matinud-anon paghatag sa serbisyo nga way motibo sa pagpahimulos. Dalaygon kining buhata kun himoon nga ehemplo sa tibuok natong kinabuhi.