EDITORYAL - Sakyanan gigamit sa personal?

Nindot ang gihimo sa mga sakop sa City Traffic Operations Management (CITOM) nga wala g’yud nila hatagi og special treatment ang sakyanan nga gipanag-iya sa Cebu City Hall nga ilang nasakpan nga gipabuntagan ra sa dalan Pelaez kagahapon.

Gituohan nga ang nag-drive sa sakyanan misulod sa duol nga Bikini Bar diha sa dalan Pelaez, ilabi na nga aduna’y dako nga botelya sa beer nga nakit-an sulod sa puti nga Multicab nga ang plate number SJM-459.

Angay’ng dili palabyon kini’ng mao nga isyo sa kadagkoan sa City Hall kay nagmatuod kini nga adunay mga sakyanan sa kagamhanan nga giabusohan g’yud ug gigamit sa personal nga lakaw.

Apan hinay pa ang kampanya sa CITOM pag-clamp sa mga sakyanan nga anha ra sa karsada i-parking kay sa ilang duha ka semana nga operation miabot pa lang og 34 ang ilang na-clamp.

Kinahanglan nga paspasan ang kampanya batok sa mga sakyanan diha sa mga sudlonon nga karsada sa kabarangayan ug dili kay anha ra sa mga dagko nga karsada.

Tudloi ninyo og leksyon ang mga tag-iya og sakyanan nga kinahanglan nga sa dili pa sila mopalit og sakyanan mangita usa sila og parking area nga dili makabalda sa karsada.

Ang ubang tag-iya og sakyanan nga wala’y parking area masuko pa kun badlongon nga dili unta sila makabalda pag-agi sa uban nga motorista.

Angay nga ang mga sakop sa CITOM nga idistino sa pagpang-clamp sa magpataka’g parking dili mga talawan nga mahadlok lang sa singka sa mga tag-iya sa sakyanan.