Mga pagkaon batok depresyon

Ang mga eksperto sa nutrisyon didto sa Amerika, miingon nga ang depresyon maoy ikaduha nga komon nga sakit sunod sa sobrang timbang o sobra katambok (obese ). Gibanabana nga kada napulo may usa gyud ang dunay sa sakit sa depresyon. Busa daghan na didto ang midangop sa ‘wellness’ program o nutrisyon diha sa atong mga pagkaon, nga makatabang pagbatok sa depresyon.

Mao kini ang nag-unang lima (5) ka pagkaon nga ilang girekomendar aron paglikay nga di maproblema batok sa depresyon:

(1) Tsokolate – kanang puro nga gikan sa cacao o black chocolate, dili blended/fortified nga giprosesong may gatas o chocolate. Nagbaton kini’g mga anti-oxidant nga mopalig-on sa maayong kabuot ug panghunahuna. Mopakalma kini sa tensyon o kabalaka.

(2) Mga prutas o utanon – kaonon kini nga direkta o mahimong i-shake o himuong presko nga juice nga sagola’g utanon, sama sa saging, orange,  avocado, mga berries, cucumber, kamunggay o brokoli ug uban pa.

(3) Mga glutein-free nga bugas (grain) – sama sa sesame wheat germs, red/brown rice (ayaw nang refined white rice), mais, barleys o trigo.

(4) Natural nga bitamina-D –nakaapektar usab kini sa hapsay nga panghunahuna kun kulang ka niini. Ang uban nga way igong higayon nga mabuwad sa hayag sa adlaw bisa’g 5 mins ngadto sa  15 mins o kaha kulang o way nakuha diha sa pagkaon mahimong magsuplemento og natural nga bitamina-D.

(5) Omega-3 fatty acids – usa kini sa motabang sa pagpahapsay o mopakalma sa sistima sa pangutok aron ang hunahuna dili magubot o bug-at nga dali ra mapikon o maglagot hangtud moulbo ang sapot. Naay daghan ini sa inadlaw nato nga pagkaon. Sama sa sardinas, tuna, salmon, walnuts ug uban pa. Importante kaayo kini nga makalikay sa risgo nga mataptan sa depresyon.

Sa laktod, atong sagupon ang himsog nga estilo sa atong kinan-an.

Kinahanglan iseguro nga ang tanang gikaon nagbaton kini’g mga nutreyens di kay ang kalami sa potahe lang unya wa diay kini igong mahatag nga sustansya.