Libaong gitapakan na

Salamat kaayo ni City Engineer Jose Marie Poblete kay gitagad tawon ang akong reklamo.

Gitapakan tawon sa iyang mga sakop ang dalan Echavez gikan sa eskena Sikatuna paingon na sa tulay. Grabe ka dagko sa libaong diha mao nga gihangyo nako si Poblete nga tapakan.

Miaksyon dayon ang akong amigo. Ang mao gud nga karsada pwerte’ng daghana nga sakyanan nga mangagi, usa na ako, mao nga nangahas ko paghangyo sa city engineer.

Bisan og nihit ang aspalto sa dakbayan apan gigahinan pa g’yud tawon og gamay ang pagtapak sa mao nga bahin sa Echavez Street. Usbon ko, salamat my friend!

* * *

Bisan og dili kaayo daghan ang mga sakyanan nga ma-clamp mata’g gabii tungod kay gi-parking kini daplin sa mga karsada dinhi sa dakbayan sa Sugbo apan arang-arang na lang kay sa wala g’yuy operation nga himoon ang mga traffic enforcers. Nahibulong ko kun ngano nga walo ngadto sa 10 ra man ka sakyanan ang ma-clamp sa mga sakop sa City Traffic Operations Management gikan sa gabii ngadto sa kaadlawon nga daghan man kaayo’ng sakyanan nga anaa ra sa karsada gi-parking.

Ang paagi diay sa CITOM mao nga ang mga sakyanan nga masakpan nila nga gi-parking ra sa tag-iya daplin sa karsada ila kini nga papitlan og “warning sign” aron masayod ang mga tag-iya nga nakalapas sila sa balaod.

Gitug-anan ko ni Joy Tumulak, ang operations chief sa CITOM, nga ang buhaton diay sa ilang mga sakop mao nga mogamit sila og megaphone aron pahibaw-on nila ang tag-iya sa mga sakyanan nga i-clamp kini kun dili kuhaon gikan sa karsada. Inigbalik sa mga CITOM enforcers, sagad sa mga sakyanan wala na sa dapit nga didto kini mag-parking. Mao kuno kini ang rason nga pipila na lang ka sakyanan ang ma-clamp.

Buyno, maayo man pud. Apan kun ingon na lang niini kanunay ang buhaton sa CITOM nga ang sama nga tag-iya og sakyanan pahibaw-on g’yud kada gabii nga nakalapas sila sa balaod, dili na tingali tukma.

Kausa ra ang pagpahibalo, sa sunod kanunay na nga i-clamp ang mga sakyanan nga masakpan nga anaa ra gihapon sa karsada o aseras ibutang.

Gimingaw man gani ko sa “towing operation” kay kadto maoy makapitol g’yud sa mga abusado nga drayber. Kun mamalit gani og mga sakyanan, kinahanglan nga duna g’yuy luna nga adto ninyo i-parking ang inyong mga kotse o sakyanan.  Ilabi na kun PUJ ug taxi, paghatag nila og prangkisa gibutang g’yud nga aduna sila’y grahe.