EDITORYAL - Surveys nga way gamit

Layo pa kaayo ang 2016 Presidential Elections apan duna nay migawas nga survey kabahin sa giingong “preferred next president” alang sa maong piniliay.

Ang nakaparat ani daw dunay malisya kay sumala pa sa report sa The Philippine Star niadtong Mayo Uno nga isyu, ang mismong research director sa Pulse Asia igo lang miangkon nga duna silay gihimong survey bahin niini, apan wala silay opisyal nga gipagawas nga resulta.

Ang mga ingon niini nga mga surveys wa kinahanglana karong mga panahona tungod kay dili man kini makatabang aron masolusyonan ang kasamtangang mga problema sa nasud sama sa unemployment, edukasyon, power, peace and order, paggukod sa mga nalambigit sa kurapsyon, ug uban pa.

Magpadugang lang kini sa pagkabahin-bahin sa mga Filipino nga karon naninguha pang makabangon gikan sa  mga katalagman.

Kung kinsa may nagbayad o nagpasiugda niini , grabe na gyud nga nagpanikad  kay di na gyud sila makapaabot sa election period sa 2016.

Tataw kaayo nga gusto sila nga karon pa lang sugdan dayon ang ilang mga ambisyon.  Nagpakita kini sa ilang kolor nga personal nga interes ang ilang giapas kung sila makalingkod sa pwesto o makapalingkod og politiko sa pwesto.

Kinsa man ni sila? Posibleng sila kadtong gustong mamahimo unyang mga cabinet members, mga commissioners ug kadtong mga tawong gustong makapabor sa tawong ilang palingkuron.

Kining  mga klaseha sa mga tawo maoy angayan nga bantayan sa mga botante, mga tawong giuna ang kaugalingong interes inay unahon ang pagtabang sa katawhan nga ilaha untang serbisyohan. Siguro moingon ang uban, unsa may naa anang survey? Survey ra man na. Ang tubag, ‘mind conditioning’ kini.  Nakatabang ba ni sa mga problema karon sa nasud?  Wa.