Dunay wa kasabot sa EDCA?

Taliwa sa kainit sa panahon, init usab kaayo ang  singgit   sa mga mamumuo nga nangayo og umento sa suweldo.

Way laing gidat-olan sa ilang pagmahay kundi ang presidente sa Pilipinas nga si Pres. PNoy.

Nakalimtan nila nga gidelegar na ang maong katungod pagbuot sa suhol sa pribadong mamumuo  ngadto sa Regional Tripartite Wages and Productivity Board sa matag rehiyon. Dinhi sa Central Visayas human na ang desisyon sa RTWPB nga imbis umento sa suweldo maoy ihatag, COLA ra nga P13 maoy  natuman segun usab sa mandar sa mga amo.

Usa sa lig-on nga katarungan sa mga tag-iya ug tagdumala sa mga  trabahoan mao ang linog ug bagyo sa milabay nga tuig. Busa  napakyas ang gipaabot nga umento sa suweldo sa mga mamumuo kinsa  misaulog niini kagahapon sa adlaw sa Pamuo.

* * *

Kun nasubo man ang mga trabahante sa pribadong sector kay way umento sa suweldo, mas labaw nga  naguol ang mga nanarbaho sa sector sa kagamhanan.

Kini tungod kay sukad sa sinugdan ubos sa administrasyon ni PNoy wa sila kadungog nga mihisgot kini og umento sa suhol sa mga  mamumuo sa  mga buhatan  sa gobyerno.   Usa sa lig-ong katarungan mao nga gikawatan og kuwarta ang panudlanan sa kagamhanan tungod sa PDAF scam.    

Busa tungod kay hapit na  mapupos ang iyang termino, kun may umento man sa suweldo sa mga  mamumuo sa gobyerno malagmit unya na  tingale  sa mosunod nga presidente sa  nasud. Kun way paglaum ang mga pribadong mamumuo  nga makadawat og umento sa suweldo, mas labaw nga way paglaum ang mga trabahante  sa gobyerno   ubos ning administrasyon ni PNoy.

* * *

Wa magkasabot ang mga magbabalaod sa nasud bahin sa kasabotang EDCA nga gipirmahan tali sa America ug Pilipinas niadtong  Lunes.

EDCA constitutional o unconstitutional?  

Ang  mga Kongresista miingon   nga constitutional ang maong  kasabotan, samtang  ang Senado miingon   nga  unconstitutional kini. Unsa man ang  EDCA sa wa pa moabot si US Pres. Barack Obama gitagoan ug wa ipabasa sa tanang  magbabalaod sa nasud? 

Kinsa ra man diay nasayud  ug nakabasa niini  sa wa pa  mapirmahe? Nganong  ang ubang mga senador  sama sa mga komunista  mikisi-kisi  man batok sa EDCA human mobiya si Obama sa nasud?

 ([email protected])