Tuyok sa ligid sa hustisya

 Girelibohan na ang mga opisyal sa Highway patrol Group-7 human gipasaka didto sa Cebu Provincial Prosecutor’s Office ang mga kaso batok kanila may kalabotan sa pagpatay sa inilang abogado nga si Noel Archival ug laing duha ka tawo. Sugod kaniadtong Huwebes sa niaging semana, gibalhin na sila didto sa headquarters sa HPG sa kaulohan. Kini samtang nag-atubang pa sila og mga kaso mahitungod sa maong insidente.

Sa niaging semana, kasong multiple murder ug frustrated murder ang gipasaka sa National Bureau of Investigation ug Philippine National Police batok kang HPG-7 chief Senior Supt. Romualdo Iglesia, Chief Insp. Eduardo Mara, Senior Insp. Joselito Lerion, SPO1 Edwin Galan, SPO1 Alex Bacani ug usa nga wala pa mailhi.

Adunay igong basihan ang nakita sa NBI ug PNP sa pagpasaka nila og complaint batok sa maong mga opisyal ug sakop sa HPG. Tungod siguro sa kakusog sa mga ebidensiya batok kanila, gikonsidera sila nga mga suspek sa pagbanhig ni Archival ug kaubanan.

Lain usab nga complaint ang gipasaka sa NBI batok sa maong mga akusado didto sa Office of the Ombudsman-Visayas gumikan kuno sa ilang paggamit og impounded nga mga sakyanan.   

Ang pagpasaka sa complaint didto sa piskalya kabahin lamang kini sa legal nga proseso. Bisan pa man niini, daghan ang nakaingon nga inanay na’ng mituyok ang ligid sa hustisya.  Bitaw. Hinaut nga dili malangan ang pagpangita og hustisya sa mga pamilya sa mga biktima. Hinuon wala pay nasayod sa sangpotanan sa kaso sa pagpatay kang Archival ug kaubanan.

 Anaa pa lamang ang complaint sa prosecutor ug wala pay pormal nga kaso nga gipasaka sa korte batok sa mga suspek. Hinuon ato sang ikonsidera nga inosente kadtong mga akusado. Kini tungod kay wala pay desisyon ang korte.

Apan ang mga Sugboanon nanghinaut nga unta masulbad sa dili madugay ang linuog nga pagpatay sa maong manlalaban ug iyang mga kauban. Kini aron sa ingon mahatagan og dinaliang hustisya ang mga nagbangotan.

Dakong personalidad si Archival dinhi sa Sugbo. Ug angay lamang nga ang kaso sa iyang pagpatay dili mahisama sa uban nga gilangaw na didto sa hukmanan samtang nagpaabot og kasulbaran.