Ang kabililhon sa dugo

Ang dugo nga nanalaytay sa atong kaugatan, mao ang naghatag kanato og kinabuhi. Pinaagi usab niini, nabatunan nato ang kaabtik, kaisog, kalantip ug maayong panghunahuna. Ang himsog nga sirkulasyon sa dugo, angay nga ato kanunay mahataga’g pagtagad o hustong pag-atiman. Kay kini ang responsable sa paghatud sa mga nutreyens aron ilawog sa 100 ka bilyones nga selyula sa kinatibuk-ang mga sistima sa atong panglawas.

Ang dugo natibuok sa mga selyula sa dugo ug plasma. Ang plasma mao kana  ang laputong likido nga naglangkob sa mga selyula sa dugo nga may mga pinong butang nga nakahawid sa plasma. Ang humokong tisyo o uyok o utok sa bukog (bone marrow) nga anaa sa mga lungag lungag sa sulod sa bukog, mao kana ang pabrika o lumlomanan sa mga selyula sa dugo. Milyon ka milyones ang matibuok nga pula ug puti nga selyula sa dugo. Kun husto na sa panahon, moipon na kini sa sirkulasyon. Ang uyok o utok sa bukog, maoy buhatan sa tulo ka klase nga selyula sa dugo:

(1) Puti o Tin-aw nga selyula sa dugo

(2) Pula nga selyula sa dugo ug

(3) Mga pleylet sa dugo.

May proseso kini aron makuha ang hustong gidaghanon sa pagprodyus sa selyula sa mga dugo pinaagi sa hustong istilo sa atong pagkaon. Ang hapsay nga sirkulasyon sa dugo makahatag kanato og himsog nga panglawas. Ang kaapiki sa pagsirkular tungod kini sa sobrang kolesterol nga nakabara sa agianan, maoy maghatag sa lawas og mga problema nga nisangpot sa daghang balatian.

Sagad sa atake sa kasingkasing, hayblad, paralisado, artraytis, ug uban pa, kini gumikan sa dili maayong sirkulasyon sa dugo. Busa likaye nga di mahilig sa parat, mantika, ug tam-is nga maoy hinungdan nga nakadaut sa trabaho sa dugo nga mokomplikar sa kalawasan. Pun-an pa sa kahugaw sama sa toksik nga kemikals nga maapil diha sa atong mga pagkaon. Ingon man usab ang dili husto o himsog nga pagginhawa nga kulang sa oksehena (oxygen ) nga mosulod sa lawas, kay ayuda man kini sa sirkulasyon, labi nag taas og alkaline ang lawas.

Busa kanunay monitora ang presyur sa dugo, ang kolesterol lebel ug ang komposisyon sa dugo kun balance o igo ba kining gikinahanglan sa panglawas.