EDITORYAL - ‘Weakest armed forces of SEA’

Ang Global Firepower 2014 Power Index miingon nga ang Armed Forces of the Philippines nabutang sa ika-37 sa rating gikan sa 106 ka mga nasud. Kini gibase sa singkwenta ka kategoriya nga sukdanan sa Global Firepower sa kapabilidad sa usa ka nasud.

Naglakip niini ang manpower, gilapdon sa teritoryong iyang gibantayan, pundo, training,  gamit, reserba, ug uban pa nga mga gikinahanglan aron mabuhat niini ang kaakohan.

Nagpasabot kining di gyud diay tantong kabentahaan ang Filipino kun itandi sa uban pang kanasuran. Kanunay itandi sa mga hinawayon ang AFP sa ubang mga armadong kusog sa ubang nasud ilabi na sa Amerika.

Kay lagi, wala kini mga tangke de giyera, way fighter jets, way aircraft carriers o mga missile-armed naval vessel ug uban pa nga makita sa ubang mga nasud.

Wa sa tumong sa AFP sa pagkahimugso niini nga manulong sa ubang mga nasud o mo-project og power sa regional areas. "Defensive" ang nature sa AFP.

Adunay AFP Modernization Act nga niadtong 2005 pa unta nakompleto apan tungod sa kasamok sa politika ug kakulang sa budget wa kini matuman.

Salamat sa administrasyong Aquino, nasugdan na ang pagpamalit og gamit militar ug gigahinan ang AFP of P70 bilyones.  Bisan gamay ra ang budget ug sa grabeng kurapsyon makab-ot ra sa AFP sa hinay-hinay nga paagi ang gipangita niining "minimum credible defense."

Sumala pa sa Global Firepower, mas labaw pa ang Pilipinas kun itandi sa Malaysia (ika-38), Singapore, ug uban pang mga nasud dinhi sa South East Asia bisan sa ka-moderno sa ilang mga gamit. Matawag pa ba ang Pilipinas nga 'weakest armed forces" sa Southeast Asia?