Pagsumpo sa kolorum

Gisugyot sa kongresista nga nagrepresentar sa ANGKLA Partylist nga patas-an ang multa nga ipahamtang batok sa mga tag-iya og pribado’ng sakyanan nga mogamit niini pagpamasahero nga wala’y prangkisa.

Nindot ang balaudnon ni Kongresista Jesulito Manalo apan bisan og himoon pa nga P1 ka milyon ang silot apan panagsa ra manakop ang mga otoridad sa mga malapason sa balaod wala gihapon kini kapuslanan.

Nagtoo si Manalo nga ang dako nga kantidad sa multa ug silot nga pagkabilanggo maoy makapahadlok sa mga tag-iya og sakyanan nga mogamit niini sa pagpamasahero bisan og wala’y prangkisa.

Aw hinuon, kun maaprobahan ang balaudnon nga giduso ni Manalo unya estrikto gayud nga ipatuman sa mga tinugyanan sa balaod, mahadlok g’yud ang mga operator og kolorum.

Gusto ni Manalo nga kadtong mag-operate og kolorum nga PUJ, multahan og P50 mil. Kolorum nga Taxi (P125 mil), Utility Van (P200 mil) ug kun bus (P1 ka milyon).

Makapahadlok g’yud hinoon ang balaudnon ni Manalo kay ipasakmit man niya pabor sa kagamhanan ang mga sakyanan nga masakpan nga gamiton sa pagpamasahero nga wala’y prangkisa.

Pagka karon P5 mil lang ang multa sa tag-iya og kolorum nga sakyanan. Kun sa usa ka tuig masakpan kausa, dili gayud alkanse ang operator og kolorum. Ang wala masabti sa mga sumasakay nga kun maaksidente ang gisakyan nila nga kolorum, dili sila mabayran sa insurance company kay ang sakyanan wala tuguti pagpamasahero. Angay’ng aprobahan kini nga balaudnon apan ipatuman ‘sab g’yud sa mga otoridad.

100 ka babaye gi-kidnap

Tulo ka adlaw nga standby, laag, suroy-suroy, lingaw-lingaw, ug sa laktud ang uban successful sa ilang bakasyon sa  trabaho  sud sa 3 ka adlaw, samtang ang  uban  nakuwangan pa, ug ang uban gikapuyan, samtang  adunay  uban  nga wa matagbaw sa kalipay.

Ingon niini  ang  tawo, diskontento kanunay  sa iyang  kahimtang, ma-datu man o kabus, malampuson ug napakyas man, nalipay man o anaa  sa kagul-anan, ang tanan wa gyu’y katagbawan. Ang uban gusto lang sige og bakasyon, sige og  lingaw-lingaw, bisan kutoy na ang  tiyan ug wa nay makaon.

Apan ang tawo nga naglantaw  og maayong ugma sa panginabuhi   ug  sa pamilya, panagsa ra mogugol sa iyang  panahon sa  kalingawan, kay mas gipalabi niini  ang  iyang serbisyo sa pamilya ug  sa  simbahan.

* * *

May gagmay nga mga bata nangutana sa Espada nganong lain-lain og dagway si Cristo nga gilansang sa krus. May itom, may di kaayo tantong itom ang panit, may taas  ug labong  kaayo og buhok, may Cristo usab nga mubo-mubo og  buhok.

Ang Espada wa maka-eksplikar  kinsay nagpasiugda niining mga butanga, kay una sa tanan wa man magsugo ang Dios sa tawo nga pahimoan og larawan  ang dagway ni Cristo aron simbahon.

Wa may tawo nga nakakuha og larawan ni Cristo kaniadto sa buhi pa Siya. Si Leonardo da Vinci ang giingong  ngilngig ug banggiitang Sculptura  kaniadto maoy unang  mi-imbento sa dagway ni Cristo.

Dihang  gihimoan  niya  og  dibuho ang last supper, nangita  siya  og  tawo  nga  kakuhaan  og dagway  para ni Hudas. Apan sa wa dahoma, ang tawo nga gikulitan niya og dagway ni Hudas, mao ra usab diay ang tawo nga  gikulitan niya og dagway ni Cristo.

* * *

100 ka  babaye ang gibihag sa mga  rebelde didto sa Nigeria niadtong  Martes.

Pulos pa ra ba mga estudyante sa high school, busa pulos pa mga batan-on.

Kaanugon baya, maayo unta  kun  patiwason og kurso  sa  mga  rebelde  o  buhian nga di hilabtan ang  ilang pagkababaye. Pastilan, di ba kaha  mahisama  niini  ang  Mindanao kun pasagdan  nga di mapuo  ang  mga  Abu Sayyaf.

* * *

([email protected])