Himoa ang imong kinabuhi ingon nga gugma

Mga punto nga angayan nimong pamalandongan:

1.  Ang gugma usa ka desisyon. Wala’y si bisan kinsa nga makapugos nimo nga imong higugmaon ang usa ka tawo kondili ikaw mismo ang mohukom niini.

2.  Ang sukaranan sa paghigugma sa uban mao man ang paghigugma usab sa imong kaugalingon.

3. Ang pagpadayag sa gugma sa mas tataw ug konkreto nga paagi.

4. Ang pagtan-aw ni bisan kinsa uban ang mga mata sa kaayo. Kay kun ang imong gitan-aw nakasentro lamang sa mga bati, nan, lisud alang kanimo ang paghatag sa paghigugma.

Airsoft bill

langay-langay lang

Human mapasar sa Kongreso ug napirmahan ni Pres. Noynoy Aquino ang bag-ong balaod sa armas de fuego, lain na usab nga balaodnon ang gisang-at – balaod nga mag-regulate sa pag-manufacture, pag-import, pagbaligya ug paggamit sa airsoft guns.

Usa sa duha ka magbabalaod si Rep. Rufus Rodriguez nga misang-at sa House Bill 3805 (proposed Airsoft Imitation Firearm Law).

Matud pa ni Rufus sa balita sa The Freeman kagahapon nga ang Letter of Instruction 1264 nga giisyu ni anhing diktador Ferdinand Marcos niadtong 1982 nag-ban sa pag-import, pagbaligya ug pagdaladala og “gun replica” sa publiko.

Apan bisan pa niining maong balaod ni Marcos, ning mga panahona, ang airsoft games sa nasud nagkadako ug nagkadaghan ang mga miyembro sa mga airsoft teams, dungan ang pagdaghan sa mga mamaligyaay niini nga nag-import og mga airsoft rifles gikan sa Japan (medyo mahal ang presyo), Taiwan ug China (barato ang presyo).

Dinhi sa Sugbo, bisan dili ingon kaklaro ang komunidad sa modula og airsoft, apan aktibo gihapon kaayo ang mga team nga naghimo og mga dula matag Sabado o Domingo. Adunay pipila ka tindahan nga nagbaligya og mga airsoft guns ug mga kagamitan sa paggamit niini sa dula.

Apan nahurot na lang nako og basa ang balita kabahin sa balaodnon ni Rufus ug sa iyang anak nga si Abante-Mindanao party-list Rep. Maximo Rodriguez, wala ko makabasa unsay “dautan” sa airsoft games nga gusto nilang pakgangon niining ilang paghaon og balaod nga kunohay mag-regulate niini.

Una sa tanan, ang mga airsoft players mga responsable nga mga tawo sa komunidad ug mismo ang team nga ilang gitukod maoy nag-regulate sa ilang grupo kinsay ilang dawaton isip sakop sa ilang team ug kinsay ilang i-itsa-puwera.

Ikaduha, wala koy nahibaw-an nga dako ug dautan nga panghitabo sa nasud o bisan dinhi sa Sugbo nga naglambigit sa airsoft ug sa mga airsoft players.

Adunay mga tulis, kawat ug panglungkab nga nanghitabo sa kauluhan, apan mga martilyo man ug llabe tubo ang gipanggamit aron pagbuak sa bildo nga gisudlan sa ilang kawatonon.

Hinuon nakahinumdom pa ko giunsa kini sa pagpanguwarta ang airsoft sa anak ni kanhi Gob. Gwendolyn Garcia pinaagi sa paghimo og mga airsoft competition sa kalungsoran nga gipagastohan sa Kapitolyo. Apan kining maong binuhatan nagtuo ko nga wala maapil sa mga buhat nga gusto sa mga Rodriguez  nga maundang nianang ilang balaodnon nga mag-regulate sa airsoft.

Sa ato pa, kanang maong balaodnon wala’y nakabutang nga proteksiyon engkaso og gamiton sa korapsiyon sa mga lokal nga kagamhanan kang kansang mga lider adunay anak o paryente nga aktibo niining airsoft games.

Nagtuo hinuon ko nga kining maong balaodnon, kun mapasar isip balaod, magmugna hinuon og burukrasya sa Department of Trade and Industry ug Philippine National Police.

Unsay nahitabo sa balaod nga nagpugos sa mga motorista pagsul-ob og helmet nga adunay sticker gikan sa DTI dili ba nahimo man nga tinubdan sa panguwarta sa DTI hangtod napakgang kay nalili-an ang balaod nga wala magtugot og bayad sa sticker?

Para nako, dili na kinahanglan nga hagoan pa sa mga magbabalaod ang pagtuki niining airsoft.

Usik ra sa ilang panahon kining butanga taliwala sa kadaghang suliran nga angayan nilang tutokan, ilabi na ang kalisod nga gisagobang sa mga Pilipino nunot nianang mga binuang ug binugo nga mga balaod ug nianang mga palisiya nga nagprotehir sa mga oligarkiya sa nasud.

Mas maayo pa nga ipangahas sa mga magbabalaod nga Rodriguez ang pagtuki og balik sa Oil Deregulation Law nga nagprotehir sa mga higanteng kompaniya sa lana ug naghimong misirable sa kinabuhi sa mga konsumedor.

Mas maayong motuki sila og mga balaodnon nga maglili sa mga negosyante og bugas nga gikunsabo sa mga negosyanteng opisyal nga naa magluklok sa National Food Authority ug Department of Agriculture aron kahatagan og alibyo ang kahimtang sa mga pordoy’ng kunsumedor nga wala gyuy nahimo sa kamahal sa mga palitonong pagkaon karon.

Mas bug-at ang pagtuki og balik nianang bag-ong balaod sa armas nga mas nagpromoter hinuon og “loose firearms” tungod sa kalisod na sa pagpalisensiya, pagparehistro sa armas ug pagkuha og Permit to Carry Firearms Outside Residence (PTCFOR).

Makapila na gibalikbalik sa mga responsable nga nanag-iya og armas de fuego ang ilang argument nga kining maong bag-ong balaod sa armas mas nagprotehir sa mga kriminal kay sa kanilang mga nanag-iya og armas nga nagsunod ug mahadlokon sa balaod.

Daghan pang mga butang nga angay hatagan og gibug-aton sa mga magbabalaod, apan maglangaylangay pa gyud og tuki niining airsoft nga wala maka-apekto sa kinabuhi sa kinabag-ang Pilipino.