Pag-ampo sa bakasyon

Karon ang semana nga giisip nga labing balaan sa mga katoliko. Karon ‘sab ang semana nga labing giabuso sa mga Kristiyano. Makalibog unsay angayan nga himuon atol ning mga adlaw sa paghandom sa pagpasakit, pagkamatay ug pagkabanhaw ni Hesu Kristo labi pa nga kini ang panahon sa pagpahuway ug pagbakasyon. Di’ malikayan nga sukdon ang atong tanlag kung unsay angayan natong himuon--- ang motamod sa mga kalihukan nga relihiyoso o kalimtan ang tanan sa ngalan sa pagpaharuhay ug bakasyon.

Husto ang tambag sa mga pari nga kun nagbakasyon man, di’ kalimtan ang paghatag og panahon sa pag-ampo ug paghinuklog sa mga adlaw nga maoy nahimong sentro sa kasaysayan sa kalibutan, ang pagpakatawo, pagpasakit, pagkamatay ug pagkabanhaw sa labaw nga makagagahum. Apan kinsa ba tang mohusga sa mga tawo kung giunsa nila sa pagtamod ang mga balaang adlaw? Kinsa ba ‘tang moingon nga diretso nang malangit ang mga tawo nga anaa nagyampungad sa simbahan atol ning semanaha? Kinsa ba ‘tang moingon nga delikadong mabutang sa wa’y katapusang pagka-alaot ang mga tawo nga mas gipili ang pagbakasyon inay ang pagyukbo sa usa ka hilom nga mga gutlo sa kinabuhi sa Ginoo?

Matud sa usa ka artikulong gisuwat sa usa ka pari, di’ mahimong libugon ang libog nang daan. Kung nagbakasyon ka ning higayona uban ang imong mga higala o pamilya, gihagit ka sa pag-ampo tunga-tunga sa imong paglingaw-lingaw. Gihagit kang maghinuklog tunga-tunga sa imong bakasyon. Gihagit kang magpuasa tunga-tunga sa kadaghan sa pagkaon nga gitanyag sa imong atubangan. Gihagit kang mobati og gamay nga pag-antos tunga-tunga sa usa unta ka lingaw ug haruhay nga bakasyon. Gihagit kang di’ makalimot sa tinuod nga mensahe sa Semana Santa tunga sa taas nga bakasyon.

Apan unsa ba ang tukmang paagi aron mahimo natong madungan ang duha ka managlahing pagbati. Adunay yano apan epektibong paagi nga gihatag ang usa ka artikulo sa simbahan. Kung naglangoy ka sa nindot nga beach ug tin-aw nga dagat, i-ampo ang mga dapit sa kalibutan nga grabeng gi-abuso sa mga industriyalisasyon. I-ampo ‘sab ang imong kaugalingon pinaagi sa paghinumdum sa mga panahon nga imong gilabay ang imong hugaw bisan asa, imong gilingiw lang ang hugaw nga imong nadumbulan, imong gitalikdan lang ang tawag sa kinaiyahan.

Kung anaa ka sa mga oras nga nag-atubang ka sa lamiang pagkaon ning panahon sa Semana Santa, i-ampo ang mga tawo nga way gikaon. Ihalad ang gamay nga oras pinaagi sa pag-ampo sa mga kabus, dinaog-daog, gipanamastamasan, gipasagdan, gibiyaan ug gikalimtan. Kung mahimo nimo nga magpuasa aron sa pagsukod sa imong katakos sa pag-antos, mahimo ra kaayo aron nga mas mabulokon ang Semana Santa. Kung anaa ka sa mga higayon nga nagsalo-salo mo sa pamilya o mga higala, hinumdumi ang mga higayon nga imong nakalimtan ang mga kabus, giyam-iran ang mga makililimos ug gipasagdan ang mga nanginahanglan.

Kung anaa ka sa mga oras sa grabeng kasadya ug pagmaya, hinumdumi ang mga panahon nga gibunal-bunalan ang Ginoo tungod sa imong mga kasaypanan, gipas-an niya ang bug-at nga krus, gilansang siya samtang gibugalbugalan sa mga nipasakit niya hangtud nga nabugtoan siya sa ginhawa. Hinumdumi ‘sab ang mga higayon nga imong gihimo ang kasaypanan bisan kung nahibawo na tang daan nga nagsubay ‘ta sa hiwing dalan. Sa maong paagi, wa’ maanugon ang mga higayon nga nagbakasyon ka apan wa’ makalimot sa usa  ka mahinungdanong semana.

Ang Semana Santa ang tataw nga pagpahinumdum ka natong tanan nga pulos lang lumalabay ning kinabuhia. Apan sama sa Ginoo nga namatay, ang iyang pagkabanhaw ang nagpahinumdum kanato nga adunay paglaom nga nagpabilin likod sa mga kasakit. Ug ang atong mga naangkon ning kalibutana, lumalabay lang tungod kay ang mahinungdanon, adunay bag-ong kinabuhing nagpaabot sa umaabot nga gipatigbabaw sa Ginoo sa iyang pagkabanhaw.

Email: [email protected]. or [email protected].