EDITORYAL - Nuclear weapons ban

Gi-ban sa Pilipinas ang bisan unsang barko o eroplano sa US military nga mosulod sa teritoryo niini human sa ikawalong round sa negosasyon sa nagpadayong “increased rotational presence” sa mga sundalong Amerkano dinhi.

Subay sa Section 8, 1987 Constitution, gidili ang bisan unsang matang sa “nuclear weapons” sa ato. Mabantayan ba gyud nato kung nagdala sila niini o wala? Motuo ba kita nga ang USS George Washington way dalang nuclear weapons matag bisita niini dinhi gikan sa deployment?  Kinsa may moinspeksyon?

Ang ‘combat readiness’ sa US forces pinasubay kini sa gidiktar sa doktrinang ilang gisunod nga kinahanglang makabawos dayon sila sa bisan unsang matang nga pag-atake. Ang ilang mga barko ug submarino nagdala nang daan niining mga nuclear-tipped cruise missiles sa tanang oras.

Ang nuclear-armed countries nagsunod sa gitawag sa international studies nga mutually acquired destruction (MAD).  Way tarong nga lider sa usa ka nasud nga mouna pagpagamit og nuclear weapon  batok sa laing nasud kun di siya gustong gamitan usab niini. Ang nuclear weapons usa ka political weapon ug di military weapon. Wa nay gustong mausab ang nahitabo sa Nagasaki ug Hiroshima niadtong 1945. Apan karong panahona mas moderno, accurate ug sophisticated na ang maong mga armas ug lisod nang pugngan. Wa pay proven nga teknolohiya nga makapakgang sa pagtugpa sa nuclear warhead.

Ang Amerika wa magkinahanglan sa atong military bases aron gamiton ang maong mga armas. Ang gusto lang nila mao ang pagbuhat og impresyon nga ‘physically’ nabalik na sila dinhi sa Asya-Pasipiko.

Sa pagkatinuod, ang Pilipinas maoy kataposang  “block” aron magkompleto ang South Korea-Japan-Taiwan-Philippines ‘defensive wall’  batok  sa China ug Russia kung ugaling atakehon ang Amerika agi sa Pasipiko. Dinhing mga nasora mabutang ang ilang anti-ballistic (nuclear, chemical, biological) missile systems sama sa Aegis; intelligence gathering, training ug uban pa. Kining mao nga mga nasud makabenepisyo sa proteksyong mahatag sa Amerika apan wala magtangtang kanila sa posibilidad nga apilon sa pag-atake sa makaaway niini.