Ang direktang pamaligya

Ang pamaligya maoy usa ka yano o komon nga kalihokang pinansyal, aron sa pagbaton og negosyo o pagsikaysikay, nga may kitaong tubo o ganansya sa serbisyo o produkto. Giila kini sa mga eksperto sa panalapi, isip sekretong propesyon o bokasyon, nga maoy labing maayong tinubdan sa panguwarta, aron moasenso nga may lig-ong tinubdan nga makab-ot ang kadato nga kahimtang.

Ang mga dato di gyud moundang aning kalihokan sa pamaligya, mao nga misamot sila kadato. Kita pud nga kabos gihimong puhonan aron modaghan og maayo ang ilang halin, kay kita man ang mamaligya. Ayaw na kasina sa ilang kadato. Maoy ibutang sa hunahuna, nga nadato man gani sila nga namuhunan lang, kita sab may posibilidad nga madato kay kita man ang direktang mihimo sa pamaligya. Ayohon mo lang ni sa pag-atiman, aduna kay nindot nga padulngan. Ayaw problemaha nga wa kay kuwarta, kay ang imong himsog nga panglawas maoy imong puhunan.Ang kakugi ug katakos nga makigharong sa isig katawo, imo rang makat-onan kun pursigido ka lang sa direktang pamaligya, diin sa dili madugay ikaw na sab ang molingkod sa truno sa pagkadato. Ang kalihokan sa tawo maoy tun-an mo, kun unsay mga panginahanglan nila aron direkta mo ihanyag ang imong baligya. Tun-an mo usab ang kinaiya mo, nga kaantigo ka makigduwa sa lainlaing batasan sa isig katawo, nga makapalit sa imong baligya. Sa sinugdanan, diskarte lang ang himuon aron aduna kay direkta nga ikabaligya. Makighigala ug makighinabi ka lang niadtong mga namaligyaay. Puwede kang motabang nila hangtud mangangkat ka sa imong gusto nga buhaton. Magpakita ka lang nga sinsero ka ug kasaligan. Ayaw gyud dauta ang pagkatawo mo kay maguba ang kredibilidad nga mawad-an ka’g relasyon sa imong mga suki. Dili mopahimulos sa dinagkong ganansiya kay may mga kompetensiya ka. Unya aron di mausik ang imong paghago, kumkoma pag-ayo ang halin mong mga sensilyo nga hatagan mo’g bili. Kay mao kini ang modesiplina kanimo sa maayong pagdala sa kuwarta hangtod dalhon ka niini sa kahamugaway sa kinabuhi. Ampingi nga di mahaylo, nga mahimong ulipon sa gahom sa kuwarta kay kini mopadasig kanimo sa mga bisyo, aron ihunlak ka nga ibalik sa demalas.