Kadaugan

Gideklarar sa Korte Suprema nga legal o nasubay sa batakang balaud ang Reproductive Health Law o RH Law.

Tungod niini tumang kalipay ang gibati sa mga pabor sa nahisgotang balaud. Apan wala sila mag-inusara sa ilang kalipay tungod kay nagmaya usab ang mga kontra niini. Sa ato pa kun imong sabton, pulos miangkon og kadaugan ang mga uyon ug supak sa RH law.

Ang Korte Suprema sa iyang hukom mideklarar sa kinatibuk-an nga legal ang RH law apan iya usab nga gideklarar ang ubang probisyon sa balaud nga dili legal labi na gayod ang probisyon nga gisupak sa mga kontra niini. Sa akong pagsabot gibalansi sa Korte Suprema ang ilang hukom aron dili masuko kanila ang mga uyon ug supak sa balaud ug sigun sa atong nakita nagmalampuson sila kay ang duha ka habig pulos miuyon sa ilang hukom.

Karon nga gideklarar na nga legal o nasubay sa batakang balaud ang RH law, ang atong pangutana, mapatuman kaha kining maong balaud sa hingpit? Masulbad na kaha niining maong balaud ang padayong pagtaas o pagtubo sa gidaghanon sa populasyon sa nasud nga mao ang gustong sulbaron sa nasudnong kagamhanan pinaagi ning maong balaud?   

Ang RH law option lamang nga gihatag sa gobyerno ngadto sa magtiayon ug matag usa mahitungod sa pagpanganak busa ang pagtubo sa populasyon magdepende gihapon kini sa magtiayon ug sa matag usa kay sa ilang paghimo og bata walay gobyerno ug simbahan nga nagtan-aw kanila ug nag-monitor sa ilang pagtumar og tambal nga makapatay sa ilang semilya.