RH law gibalanse sa Korte Suprema

Maayo nga pagkabahig sa Korte Suprema ang desisyon nga nagdeklarar sa Responsible Parenthood and Reproductive Health Law nga constitutional. Balanse sa moralidad ug responsibilidad ang desisyon.

Apan malipay ba kaha ang Malacañang niining desisyon nga mas mipabor man kini sa moral nga aspeto kay sa responsibilidad nga giduso sa gobyerno?

Ang Korte Suprema mideklarar nga constitutional sa probisyon nga magtugot sa Department of Health nga makapamalit ug makapang-apod-apod og mga kontraseptibo ug mohatag og RH education sa mga bayong-bayong na. Apan kining maong probisyon dugay ra nga gibuhat sa gobyerno mao nga migawas ang pasangil nga panapi ra gyud kini.

Apan gideklarar niini nga unconstitutional sa probisyon nga magpugos sa mga pribadong health facilities ug medical centers nga gipanag-iya sa mga relihiyosong grupo sa paghatag og family planning methods. Bitaw, nganong pugson man ang Simbahan niini nga gisupak man gani kini.

Gideklarar usab nga unconstitutional ang probisyon batok sa mga health care providers nga mobalibad sa paghatag og reproductive health services. Busa, dili mapakasala ang mga medical practitioners nga mobalibad sa pag-refer sa mga pasyente og RH services; dili makapasala ang mga opisyal sa gobyerno nga mobalibad pagsuporta sa RH programs; ug ang mga minyo nga indibidwal nga mohangop sa RH procedures nga walay pagtugot sa kapikas.

Sa ato pa, dili ikapamugos ang serbisyo ubos sa RH law sama sa family planning ug kontraseptibo, base niining desisyon sa Korte Suprema. Mag-agad ra gyud kini sa kagustohan sa tawo.

Laing probisyon nga gideklarar nga unconstitutional mao ang pagpugos sa mga gynecologists, obstetricians, medical centers ug institutions nga mohatag og “libre” nga RH services aron mahimong accredited sa PhilHealth. Kun wala pa kini ideklarar nga unconstitutional, maglisod kita pagpangita og doktor nga accredited sa PhilHealth kay daghan pa gihapon kanila ang supak niini.

Ang Korte Suprema, niining maong desisyon, mikonsiderar gihapon nga ilegal sa mga kontraseptibo nga abortifacients. Sa ato pa, kun adunay kontraseptibo nga makapakuha sa bata sa sabakan sa inahan, ilegal kini.

Hinuon, ang kagamhanang nasyonal aduna pay 15 ka adlaw sa pagsang-at sa ilang motion for reconsideration. Apan sa akong tan-aw, mao na gyud kini ang baruganan sa tanang mga mahistrado sa kinatas-ang korte sa yuta.

Ug maliso pay buko sa kawayan.