Mga positibong kinaiya

Ang positibong panghunahuna mao kini ang kinaiya nga unsa man ang moabot nga sitwasyon sa kinabuhi, malaumon gihapon sa kasayon nga maabot ang gustong mahitabo sa pangandoy. Bisan pag anaa na sa kagrabe nga kalisdanan sa pakigbisog, wala’y imposible nga nakita diha sa panlimbasog. Padayon hangtud ang kahimatngon sa kausaban, mao na usab ang buhaton.

Mao kini ang talagsaong hiyas o kinaiya nga sagad anaa niini ang atong kaliwatan. Gipamatud-an sa kasaysayan, nga daghan nang mga langyaw ang midumala kanato, apan di kontento sa pagpaulipon kay buot niini nga kita ang makabarog nga mapagarbohon. Bisan kini nagkahulugan og taas nga pag-antos, sa pagbag-o, nga dili balehon ang unsa man nga makapaluya sa paglaom. 

Diwa kini nga nag-awhag kanunay sa atong galamhan. Molahutay sa pagpailob, morisgo nga way kukahadlok bisan pa man sa kakutas, may kusog pang mabuhat niya ang mga posibilidad, aron lang dawaton ang sangpotanan. Kuniskunison man sa pagsulay, dili motagam mahagit hinuon nga mas hingusgan pa ang kutob sa mahimo. Talagsaon ang ingon ini nga kaisog, nga wala makaila kun unsay pagsibog, nga ang tanang maangkon iyang isipon nga pagdaug. Tungod kay ania kita sa bag-ong panahon, bisag gamay lang kita sud-ongon sa kalibutan, apan may dako kitang kahimoan nga di usab hibintahaan. Nga sa unsa may kauswagan, dayag na kita sa kadaghanan nga kita di basta mapukan. Ang kaliwat nato nga kabos lantawon apan milagro naabot ang lisod katuhoan. Nakatungtong kita sa panlantaw nga usa sa lig-on nga katawhan nga naghatag dungog sa atong nasod. Gumikan sa way hunong nga gihimo ang positibong kinaiya sa mga panlantaw nga alang sa atong kabulahanan ug sa isig kaingon.

Dili kita motugot nga duna pay mawad-an sa paglaom. Magkat-on kita sa pagdasig sa kaugalingon ug paghatag sa atong mahimo sa uban aron mas molig-on ang kalamboan sa pagtinabangay. Ihanyag ang atong mga talento, sa ingon kapahimuslan sa kadaghanan. Kay kini mao may diktar sa atong positibong kinaiya, nga way kal-ang sa pagduhaduha ug mga lakang sa imposibilidad, nga mobabag sa pagdawat sa kalamposan, diha sa dili matukib nga bationg kalipay.