EDITORIAL - Wala’y kooperasyon Daghan

Daghan na kaayo’ng branches sa LBC Express courier and money forwarder nga gipangtulis apan ang tagdumala niini wala pa gayud makakat-on og leksyon. Madani g’yud ang mga tulisan pagtulis sa mga branches sa LBC kay wala man sila mokuha og gwardiya.

Mahimo pa gani nga ang ilang gipakita nga wala’y kooperasyon ngadto sa kapolisan aron unta mailhan ug madakpan ang mga tulisan makapasamot pa sa kaikag sa mga dautang elemento nga ang LBC maoy kanunay’ng target sa ilang pagpanulis.

Tinuod, adunay Closed Circuit Television (CCTV) camera ang kadaghanan sa mga LBC Branches nga nagbase sa lainlaing dapit sa Sugbo, apan mag-unsa man ang mao nga mga CCTV footage kun ang tagdumala dili mohatag niini ngadto sa mga polis?

Matud pa nga gi-delete hinoon ang footage nga makatabang unta sa imbestigasyon sa kapolisan.

  Kun ingon niini ang batasan sa tagdumala sa LBC nga dili mokooperar sa kapolisan, mas labing maayo nga kun tulison sila dili na lang nila ipahibalo sa mga polis kay ang mao nga pagpanulis madugang ra kini sa mga “unsolved cases” ug makapabati sa imahe sa kapolisan.

Nasayud na kita nga ang kapolisan dili makabantay kanato sa tanang higayon aron mapugngan ang mga pagpangawat ug uban nga mga krimen. Kun adunay krimen nga mahitabo, atong tabangan ang mga polis.