Beninditahang lukay

Hapit na ang Palm Sunday kon pamindita sa lukay. Ginganlan sad ni nga Domingo da Ramos. Usa kini sa mga mahinungdanon nga bahin sa kasaulogan sa Semana Santo sa mga nasud, lakip na ang Pilipinas, diin ang tinuohang Katoliko mihari kon gipatigbabaw.

* * *

Naay mga nangutana unsaon man kining beninditahan nga lukay kun malaya na kini? Nagkalain-lain ang himoon niini sa nagkadaiyang kanasuran nga Katoliko.

* * *

Dinhi sa ato, sunogon kini ug tipigan sa simbahan ang abu niini aron maoy gamiton pagpamadlis atol sa Ash Wednesday kon Adlaw sa Badlis nga maoy giilang sinugdanan sa selebrasyon sa Semana Santa.

* * *

Didto sa pipila ka mga nasud sa Latin America, ilang ilubong sa yuta ang laya na nga lukay. Ang lubngan mao ang dapit diin nahimutang ang entrance kon gate o pultahan sa panimalay.

* * *

Naa say mga dapit sa Latin America diin ang laya nga lukay humulan og lana ug kini gamiton nga panghaplas sa dapit sa kalawasan nagsakit o ba kaha namaul. Ang uban ilang ihidhid ang lana sa tampihak o kilid sa agtang kun gisakitan o gilabdan sa ulo.

* * *

Kining atong lindog karon kinutlo, kini sa artikulo nga gipada diri kanato ni Ginong Martin de Guerrero, usa ka Catholic lay minister. Daghan salamat, Sir Martin.

* * *

SA LAING BAHIN ... Si Banat News correspondent Quir Laping de Gracia duna unyay artikulo kabahin sa Palma. Atangi ... ninyo ... Daghang salamat sa mga Banat News newsboys kinsa mosuroy ning atong mantalaan sayo pa kaayo sa buntag. God bless.