Bana gustong ibaligya ang balay nga sinunod sa iyang asawa

Dear Atty. Divine,

Duna lang unta ko’y ipangutana may labot sa house and lot nga sinunod nako sa akong mga ginikanan nga mao karon ang among gipuy-an. Sa dihang namatay ang akong mga ginikanan, ako ug ang akong bana mibalhin sa pagpuyo sa balay sa akong mga ginikanan kay ako man ang naka inherit niini. Human sa napulo ka tuig namo nga pagpuyo sa maong panimalay gusto sa akong bana nga ibaligya ang maong property kay gusto niya nga mobalhin mi sa pagpuyo sa siyudad. Apan wa ko mosugot kay handumanan ko kini sa akong mga ginikanan. Ang akong pangutana attorney kun kining maong balay ug yuta nga akong na-inherit sa akong mga ginikanan makonsiderar ba kini nga conjugal property namong magtiayon?Makabuot ba ang akong bana sa pagbaligya niining maong property? Hinaut nga imong matubag ang akong pangutana. Thanks and more power to you. — Jessa

Dear Jessa,

Kanang kabtangan nga sinunod sa asawa o bana gikan sa kabilin sa iyang ginikanan magpabilin kana nga exclusive property sa asawa o bana nga mi-inherit niini. Buot ipasabot nga kanang balay ug yuta nga imong sinunod sa imong mga ginikanan imo kana nga exclusive property ug dili kana makonsiderar nga conjugal property ninyong magtiayon. Ang Article 109 sa atong Family Code, naglatid kun unsa nga mga butang ang magpabilin nga exclusive property sa matag magtiayon ug kini naglakip ning mosunod:

1) That which is brought to the marriage as his or her own;

2) That which each acquires during the marriage by gratuitous title;

3) That which is acquired by right of redemption, by barter or by exchange with property belonging to only one of the spouses; and

4) That which is purchased with exclusive money of the wife or of the husband.”  Tungod kay exclusive property man nimo ang maong balay ug yuta, dili makadiktar kanimo ang imong bana ug dili siya makabuot sa pagbaligya niini kay wa siya’y labot sa maong property. Daghang Salamat ug God Bless. — Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong mga pangutana matag adlaw’ng Miyerkules ug Domingo pinaagi sa akong column.