EDITORYAL - Talisay Landing

Niadtong Marso 26 gisaulog sa Talisay City ang Takas sa Talisay o Talisay Landing. Mao kini ang pagbalik –lantaw sa kasaysayan kabahin sa pagbalik sa mga Amerikano sa Pilipinas aron haw-ason kita  gikan sa mga kamot sa mananakop nga Hapon niadtong 1942.

Kada tuig kining gihimo sa Talisay aron matanom sa mga huna-huna sa kabataan kun unsay nahitabo kaniadto ilabi na ang paghatag og bili sa mga sakripisyo sa atong mga beterano panahon sa Ikaduhang Kalibutanong Gubat

Samtang gibalik-balik kini og saulog, mas maayong ipokus usab ang pag-edukar sa kabataan kabahin sa unsa kadautan ug epekto sa gubat ug dili kun si kinsa maoy nagpasiugda niini.

Sama sa atong mga beterano, angayan usab sigurong hatagan og gamay nga pagtahod ang mga sundalong Hapones bisan sa kabati sa ilang gihimo kaniadto .

Misakripisyo usab sila sa ilang kinabuhi , diniyos usab ang ilang pagsunod sa kamandoan sa ilang mga labaw nga way pagduhaduha tungod kay sila usa usab ka maayong mga sundalo.

Gibana-banang usa ka milyong Filipino ang namatay sa maong gubat; 131,028 niini namatay ug napamatud-ang biktima sila sa 72 ka  war crimes.  Samtang ang Amerika   10,380 ang namatay ug 36,550 angol apan ang Japan  255,795 ka sundalo ang namatay dinhi sa Pilipinas sumala pa sa Wikipedia.

Human sa mapait nilang kasaysayan nakat-on og leksyon ang Japan. Leksyon nga nagpausab sa ilang panglantaw sa kalibotan ug gisilsil nila sa alimpatakan sa ilang kabataan.

Gani sa matag  anibersaryo nga may kalambigitan sa World War II sa nagkadaiyang mga dapit sa Asya, duna gyu’y mga representante sa Japan nga motambong niini aron subling mangayo og pasaylo sa nahimo sa ilang nasud niadtong mga panahona. Mga war crimes nga wa buhata niining mga representante apan bisan pa man sa kauwaw ilaha kining gihimo kada tuig aron lang ipakita sa kalibotan ang ilang paghinulsol.