Landscape sa San Nicolas

Dili masulbad ang mga disgrasya sa kadalanan kun ang mga drayber sa mga bus ug minibus nga maoy kasagarang malambigit sa mga aksidente nga usahay mopatay og mga inosenteng pasahero, magpabilin sa kagahi sa ilang ulo. Apan kay ania man kita sa Republika kang kansang gobyerno dili molihok batok sa mga malapason sa lagda kun walay moreklamo, ang Land Transportation Office ug Land Transportation Franchising and Regulatory Board nagpabilin nga inutil sa ilang kampanya batok sa mga drayber nga kulang sa seminar.

 Niadtong Domingo sa hapon, ako’y gikuyawan sa gibuhat sa duha ka mga minibus nga naglumba-anay gikan sa Linao-Lipata, Minglanilla paingon na sa siyudad sa Sugbo. Sakay sa gamay’ng awto, migikan akong pamilya sa among balay sa Pakigne, Minglanilla sa dihang nagdagan lapas sa parokya sa Lipata miagi ang duha ka yellow nga minibus nga naglumba-anay. Ang usa ka minibus nga nagtangag sa plakang GXC 197 milapas gyud sa iyang dalan ug mi-counterflow bisan adunay mga sakyanan nga nagdagan sa pikas lane. Apan ang usa ka minibus nga nagtangag sa plakang GXW 328 kusog kaayong milusot sa mga sakyanan pinaagi sa pag-bosina matag suot niini aron makalumba sa usa nga minibus.

Naabtan pa namo ang maong duha ka minibus paingon sa flyover sa Tabunok ug nakit-an pa nga naglumbaanay sa wala pa ang Gaisano Tabunok.

Akong awhagon ang LTO-7 o LTFRB-7 sa pag-imbestigar ning duha ka minibus. Dili unta hulaton sa mga opisyal ning duha ka rehiyonal nga buhatan sa ahensiya sa transportasyon nga dunay mangamatay una pa sila mo-aksiyon.

* * *

Nalipay ko nga adunay bag-ong mga pari nga gidestino sa Parokya ni San Nicolas de Tolentino, ang simbahan diin ako nakaserbisyo isip sakristan ug tigbagting sa kampana matag alas 4:45 sa kaadlawon niadtong high school pa ko.

Sa miaging team sa mga pari, naluoy ko nga nagtan-aw sa among simbahan tungod kay hilabihan kahugaw ug kangitngit. Na-obserbahan nako nga mingaw kaayo ang parokya ug ang mga tawo daw layo kaayo sa simbahan. Apan karon nga si Msgr. Adelito Abella ang gibutang isip team moderator sa team ministry, ang mga tawo nagsugod na og duol og balik sa simbahan.

Apan labaw nakong pasalamat nga gibutang sa San Nicolas si Fr. Nani Bercede, ang suod nako nga pari sa dihang sa Minglanilla pa kini nadestino, tungod kay iyang gisugdan ang kalimpyo sa palibot sa simbahan ug gisugdan ang panindot pinaagi sa pag-aplay sa iyang pagka-eksperto sa “landscaping” sama sa iyang gibuhat sa Immaculate Heart of Mary Shrine.

Tungod sa presensiya ni Fr. Nani sa San Nicolas, nagtuo ko nga ang dakong hawan sa gitawag namo og “patio” nga gihimo na lang og parkingan sa mga sakyanan ug daghang hugaw ug basura, malimpyo na ug mabuhatan og landscape.

Unsaon paghimong legal sa panagtipon kun ang iyang kapuyo nagpabiling minyo?