Tigulang nanginabuhi’g tinarong angay kaluy-on

Sulod sa merkado sa eskina Banawa, V. Rama Avenue, adunay nanindag isda nga tigulang na kaayo. Tingale hapit na mo-70 iyang edad, apan abtik lang gihapon molugit sa hasang ug mokiskis sa himbis sa mga isda nga paliton sa iyang mga kustomer. Naminyo na iyang mga anak. Ubay-ubay na siya’g apo. Pero siya lang gihapon ang mopakaon nila.

Mga gagmay‘ng isda ang sagad ibaligya ni Lola: bolinaw, dughanan, bilongbilong, potpot ug uban pa. Usahay, medyo lawos na ang mga mata sa isda timaan nga dili na lab-as. Apan bisa’g nasayod ko nga hilada kini, mopalit gihapon ko sa iyang tinda. Ngano? Tungod kay bisag siya giuban na, wa gyod siya magpakilimos sa dalan. Dili sama sa mga batan-ong bulingit, kinsa nagdalag lata, manguhit sa mangagi ug mangayo’g kuwarta. Usab, dili sama sa car watchers, kinsa bisa’g himsog kaayo’g lawas mokalit lag butho inig andar sa sakyanan, pasangil la’g sinyas-sinyas paatras-paabante sa kotse. Kay ang tumong magpabayad sa ilang serbisyo nga wala kinahanglana.

Sa Tabo, aduna poy mga tigulang na nga taga bukid, kinsa namaligya’g utanon nga iladlad lang sa yuta nga hinapina’g dahon sa saging. Daghan nang sakit ang gipamati sa ilang lawas, apan nanginabuhi lang gihapon sa tinarong nga paagi. Di na makatuyhad sa pagbarog, pero moalsa lang gihapo’g lagutmon aron ibaligya.

Mga senior citizens sila nga wa magsalig sa hinagoan sa uban. Bisan sila nagkangokango na, nagpakabuhi gihapon pinaagi sa kaugalingon nilang singot. Hangyo lang. Kun kamo makakita niining mga tigulanga, ayaw pagpanuko pagpalit sa ilang tinda. Daghana, o hutda! Ug intawon, ayaw na’g hangyoa ang presyo sa ilang baligya. Kay niini lang paagiha nga makapakita ta sa atong gugma ug kaluoy ning mga linalang, kinsa nihit na kaayong makit-an ning atong panahon karon.