Ang ahos

Usa ka matang sa lamas, nga matud pa sa mga kusinero, kini ang sekreto sa pagpalami sa pagkaon. Wala’y ahos wa gyu’y lami ang giandam nga potahe. Hinuon duna say mga tawo, kun may mausap nga ahos, bisa’g sa baho lang ini maluya na malain mora’g malipong. Apan ang ahos, giisip nga usa ka natural nga anti-viral ug anti-bacterial, nga pangontra sa kadaut sa panglawas. Dugay na kining gigamit nga natural nga alibyo o tambal, sama sa mga mosunod:

• Hayblad presyur – Ang pag-ugom og usa ka lusok sa pinanitang ahos, makapaubos na sa presyur sa dugo. Una kini ugomon ,ituslob usa sa ininit nga tubig. Ayaw usapa kay makagabok kini sa ngipon. Pasagding tupson sa laway nga mao nay inanay mosud sa sistima sa sirkulasyon. Mahimo sad idungan sa tingkaon ang 2-4 kalusok nga kilawon lang. Di kini permi buhaton kun duna kay sakit sa ulcer.

• Sakit sa ngipon – Pagdukdok la’g igo masud sa lungag sa apektadong ngipon, unya paslaki og gapas. Buhata kini kaduha ka beses sa usa ka adlaw, hangtud mawala ang gipamating sakit.

• Sakit sa ulo – Magdukdok og 1-2 ka lusok sa ahos nga pinanitan. Unya imasahe sa sentido, ighuman itapal sa agtang.

• Rayuma – dukdoka ang igong gidaghanon sa ahos nga gipainitan ug idangdang sa kalayo. Unya itapal o ihaklap kini sa apektadong bahin  sa lawas. Buhata kini kaduha ka beses kada adlaw hangtud dili na magsakit.

• Alipunga – Panitan ang tibuok ahos unya hiwahiwaon og pino. Ighuman inusnos kini kausa sa usa ka adlaw. Unya monitora kun gikinahanglan pa ba ipadayon.

• Nahiloan – Dukdoka ang sinunog nga tibuok ahos, ighuman isagol sa tunga sa basong tubig, ug unya ipainom sa nahiloan.

• Pinaakan sa insekto – Pagdukdok og ahos nga pinanitan, ighuman inusnos sa pinaakang bahin sa lawas. Ayaw ni gamita ngadto sa masuso o gagmay pang bata, kay madaut ang panit nila.

• Pabaskog sa lahutay – Isip lamas, aduna sab ni gahum mopalagsik o mopalahutay kun isagol kini sa mga pampagana sa seks nga pagkaon sama sa bakase, lansiao ug uban pa.