Ayaw langaya

Sa sunod semana na kuno i-award sa Department of Transportation and Communication ngadto sa winning bidder ang proyekto alang sa expansion sa Mactan-Cebu International Airport.  

Kahinumdoman nga ang consortium sa GMR ug Megawide maoy highest bidder alang sa maong proyekto. Kini human nga miduso sila og subra sa P14 bilyones nga project proposal, ang labing taas sa tanang mga bidder. Apan nalangay ang pag-anunsiyo sa DOTC sa midaug sa maong bidding gumikan kay adunay mikwestiyon sa highest bidder nga mao ang  Megawide-GMR. Ang maong reklamo mao karon ang subject sa usa ka imbestigasyon sa Senado ug Ubos Balay Balauranan.

Tungod kay giuktaba man ang announcement alang sa mananaug nga consortium, nalangan usab ang implementasyon sa maong proyekto nga usa sa labing dako sa Kabisayaan ug Mindanao.  

Niining maong kalamboan, ang mga Sugbuanon maoy klarong napildi. Kini tungod kay matag adlaw nga na-delay ang implementasyon sa maong proyekto, dako usab nga pahanon ang nasayang alang sa kalamboan sa ekonomiya sa Sugbo.

Sa estado sa Mactan airport karon, dako kini og kulang alang pag-accommodate sa mga minilyon nga pasahero nga mogamit niini matag tuig. Nagkinahanglan na kini og modernong kahimanan.

Tungod sa grabe’ng paglambo sa Sugbo, hagbay ra unta nga gi-modernized ang maong airport. Gani, basi sa mga pagtuon, subra na sa capacity niini ang operasyon karon sa maong tugpahanan.

Dili nato ikalimod nga ang usa ka world-class nga airport dako og ikatabang pagdani sa mga turista, ilabina sa mga langyaw. Ug dinhi sa Sugbo, subong palandungon nga ang grabe’ng paglambo sa ekonomiya wala matupngi sa kalidad sa kasamtangang airport.

 Adunay taho nga daghang mga langyaw’ng turista ang mireklamo tungod sa ka kulang sa modernong pasilidad sa MCIA. Kun nasulbad pa unta kining maong problema kaniadto, hayan nga mas daghan pang turista ang nadani pagbisita sa Sugbo.

Angay lamang nga ang Sugbo, isip sentro sa komersiyo sa Kabisayaan ug Mindanao, makabaton og modernong tugpahanan sa daling panahon. Ug hinaut nga dili kini mismo langayon sa kagamhanan.