Si Serge tingali’g gusto’ng mag-vice president ni Binay

Nagsunodsunod ang mga pangatake ni Senador Serge Osmeña batok kang Noynoy. Tapus sa pila ka tuig nga waa kaayo siya’y tingogtingog, sa kalit lang nagpa-limelight ang Sugbuanong Senador, dili aron pagbutyag sa iyang mga accomplishment, dili aron pagpadayag sa iyang baruganan batok sa tandugon nga mga issue, dili aron pagpahibawo kun pila ka balaudnon ang iyang napasaka sa Senado ug pila niini ang nahimong balaud … kundili, aron pagpanaway sa administrasyon ni Noynoy.

Sa ato pa, all of a sudden, nahimo siyang oposisyon. Of course, dili perpekto si Noynoy, apan, daghan siyang nahimo nga maayo, apan, ang nakita ni Serge mao lamang ang mga imperfections ni Noynoy. Ngano man ni?

Nagpa-pansin ba lang siya … o duna siya’y buot ipasupot nga mensahe nganhi kanato, o ngadto kanila ni Noynoy ug Vice President Binay … nga siya si Serge will be a strong, unbeatable vice presidential timber.

Ug tungod kay ang iyang posturing karon may pagka-opposition man, lagmit, nagpa-attract siyang Binay. Pagka-vice president sa 2016? Kahibawo man ta nga anything can happen in politics … in Philippine politics.

Particularly in Philippine politics, sa ubang kanasuran, sa America pananglitan, di man sila magpakauwaw pagbalibali og partido. Lahi dinhi sa ato nga ordinaryo ug ipasigarbo pa ang pagbalimbing.

Ila dayong i-justify nga alang sa kaayohan sa lungsod ang ilang pag-ambak ngadto sa laing partido. Kaylagi, ang ilang loyalty ngadto sa ilang partido ends when their loyalty to the country begins. As if ang partido nga ilang gibiyaan dili loyal to the country.

Naunsa na ba ta ini uy?

* * *

Ang Mandaluyong City nagsugod na’g patuman sa ordinansa nga magsilot sa mga ginikanan kansang mga minor nilang anak madakpan pagsupak sa balaud. Mahimo kaha ni dinhi sa ato? Lisud no?

Kun himuon kini dinhi sa ato, unsa man unya ang depensa sa mga ginikanan kun madakpan ang ilang mga anak nga nagyupyop o namaligya sa gidili nga drugas? Dawaton ba sa korte ang pagpangatarungan sa ginikanan nga wa’a sila’y kalibutan sa kalihokan sa ilang mga anak?

Kahinumdom ko, duna koy nabasahan sa Internet nga sa usa ka estado sa America, ang mga ginikanan sa minor nilang anak nga nagpunay og absent sa klase, maoy gisilotan. Dapat na lang.  Kun magsige na’g absent ang usa ka menor de edad nga anak, something is wrong with the parents, tingali.

Kun ang usa ka menor de edad nga babaye, maglaroylaroy hangtod sa halawom nang takna sa gabii, mabuntagan usahay, manimahong alak ug aso sa sigarilyo, unsay imong ikasulti sa mga ginikanan ining bataa?

Tingalig tagsa ra silang magkita sa balay, busa ang bata adto na lang istar sa gawas.