Island sa B. Rodriguez makatrapik

Nagpadayon ang gihimong island nga mitunga sa 6-way lane diha sa dalan B. Rodriguez ning dakbayan. Miokupar og dakong espasyo ang maong center island kay imbes kaniadto gamay ug mubo ra ang gilapdo’g katas-on, karon gipadak-an ug gipatuboan na kini. Duda ko, aron katamna’g mesitas sama sa dalan Osmeña Boluevard  (formely Jones Avenue).

Gumikan niini, ang 6-way lane nahimo na lang 4-way. Gani, karon pa lang nga ongoing pa ang maong proyekto, nakasinati na ma’g, heavy traffic ang mga drayber sa nagkadaiyang matang sa sakyanan. Samot na, kun mahuman na gyud kini.

Kaniadto, ang matag left ug right lane sa nahisgutang karsada luag kaayo sa tulo ka behikulo nga magdagan. Ang gustong moobertik, di maglisod ug makahimo gilayon kay may eksakto mang allowance. Pero, bisan pa sa maong kaluag, panahon sa rush hours maghuot gihapon ang kutay sa mag-abot nga behikulo. Unsa na kaha inig ka human niining island? Segurado gayud, nga di na makairog ang mangatanggong nga sakyanan.

Ning pagsulat ko lang niining artikuloha, lugos na masulod ang tulo ka sakyanan sa tuong bahing kanto paingon sa nagdupang taas nga dalan sa V. Rama tungod kay paigo na man lang sa duha ang gidak-on sa nahabilin human kakuhaig lugar sa gihimong island.

Mubo ra ang karsada sa B. Rodriguez. Dalan pa gyud kini sa duol nga mga ospital: Chong Hua ug Don Vicente Sotto Memorial. Panahon sa emerhensiya, imbes sayon ra unta ang pag-agi, mahimo na unya hinuong lisod. Kay inay padak-an ang dalan, gipagamyan man nuon.

Mora’g, dili nindot ning diskarteha, Mayor Mike, da! Sulbad sa problema sa dalan ang atong gipangita. Ug dili dugang sa problema. Inay Yelow Solid Line lang ang ibadlis sa tunga, imo man hinuong gipatukora’g sagabal nga island? Puslan mang mogasto ta’g dakong kuwarta alang sa usa ka proyekto, atong seguroon nga kini mapuslan ug makalipay sa tanan. Ug nungkang, makapakonsimisyon lang!

Daghan ang wa makauyon ning gitukod nga center island sa B. Rodriguez. Sila, lakip na kining tagsulat kanimo, Mayor, muhangyo: “Mahimo ba nga dili mo na lang kini ipadayon? Useless man gud ni. Ug dili useful.