EDITORYAL - Problema sa basura

Nagkagrabe ang problema sa basura dinhi sa Sugbo.

Ang executive director sa Bantay Dagat mibutyag nga ang kadagatan nga nahimutang sa tunga-tungang bahin sa Barangay Sawang Calero ug sa kanhi Kawit Island napuno na sa basura nga ang gihabugon tupong na sa tawo.

Ang mga motorista o mga tawo nga mo-agi didtong dapita dili makakita sa basura nga napundo sa maong lugar kay kini tua man sa ilawom sa dagat. Apan bisan dili makita, timailhan kini nga nagkadako ug nagkagrabe ang problema sa siyudad kabahin sa basura.

Kung mahinumduman, gisirad-an na ang sanitary landfill sa siyudad didto sa Barangay Inayawan human kini niabot na sa iyang maximum capacity human sa 15 ka tuig nga operasyon. Tungod sa pagsirado sa sanitary landfill, ang Siyudad sa Sugbo adto na molabay og basura sa usa ka private landfill sa Barangay Polog, Consolacion.

Apan dili ra diay ang sitwasyon sa landfill ang problema sa siyudad human mahibaw-an nga tua sad diay dakong problema sa basura ilawom sa dagat. Mga selopin, sako ug uban pang matang sa basura natipun-og diay didto!

Mo-aksiyon na unta dayon ang kagamhanan sa siyudad aron ma solusyunan ning problemaha. Kinahanglan mahaw-as kadtong tonelada nga basura nga napundo sa ilawom sa dagat unya hugtan na ang pag-monitor sa paglabay sa basura aron dili na kini mausab nga sitwasyon.

Dili na unta maghuwat ang kagamhanan sa Sugbo nga mokalit na lang og tubo ang usa ka isla sa dapit diin nakit-an ang nagtipun-og nga basura sa ilawom sa dagat.