Pastilan nimo kapitan!

Ang kapitan sa Barangay Labangon nga si Victor Buendia bisita sa binayran nga programa sa DYLA kaniadtong Huwebes sa udto.  Iyang gibutyag nga wala siya malipay nga gituki nato dinhi sa lindog ang nagtipun-og nga basura nga usahay dili makuha diha sa dalan Tres de Abril ug ubang dapit sa iyang barangay.

Kun nahimangod ka nako Kapitan Buendia nga misuwat niadto, mas daghang mulopyo didto sa duol sa dapit nga gipundokan sa mga basura nga nagbagulbol ug tingali nagmahay nga gipili ka nila.

Husto ang imong gihimo kapitan nga mireklamo ka didto sa Ombudsman kay matud nimo usahay dili hakuton sa basurero nga sakop sa Department of Public Services (DPS) ang basura sa imong barangay.

Pagkasayon ra nianang problema kun dili lang nimo ipatigbabaw ang pamolitika. Wala ka lang tingali masayod kapitan nga nakatabang ko pagsulbad sa imong problema sa barangay.

Dihang kanunay nako nga maagian ang nagliundok nga mga basura nga wala mahakot sa daplin sa Tres de Abril gikontak dayon nako si DPS Chief Rolly Ardoza ug pagkaugma dayon ug sa misunod nga mga adlaw gihakot na pirmi ang basura.

Kun imong personal nga gipakigkitaan ang hepe sa DPS ug dungan nga gihatag nimo ang kopya sa imong suwat, o kaha moadto ka sa mayor, aron ireport nimo kun tinuod man nga wala hakuta kanunay sa DPS ang imong basura, dili ba maayo?

Ang nakadaot gud nimo kapitan kay ipasuwabi man nimo ang politika. Mahadlok ka man nga makigkita sa mayor abi kay “diehard” ka nga dumadapig sa iyang kontra.

Para nako, dili problema ang “political affiliation” kun amigo ka ni kanhi Kongresista Tommy Osmeña apan kun serbisyo na gani sa katawhan, ayaw kataha pag-adto sa City Hall.

Unya, kun adunay mga kumentaryo sa radyo ug mantalaan nga wala ka makagusto, ayaw pag-ingon nga basin og adunay nagsugo kanako pagsuwat aron lang dauton ka kay binabaye na. Dili ba lalaki ka man kapitan?

* * *

Sa binayrang programa sa DYLA nga gidumala sa Public Information Officer (PIO) nga si Carlo Dugaduga ug Eli Espina, gipahibalo nila nga ang aseras ibalik na g’yud kuno para sa “pedestrians.”

Apan nagpanuko si Mr. Dugaduga pagbasa sa akong mensahe sa radyo kay nangutana man ko nganong wala man nila matandog ang aseras duol sa Barangay Hall sa Santo Niño nga padayong giukopar sa mga tindera, lahus na sa karsada?

Kun ila nga tinud-on ang gipasiatab nila sa programa kagahapon, tingali mamuwa ning akong kamot sa pagpagakpak ug saludo ko kanila.