EDITORYAL - MCWD dili takus moserbisyo

Daghan ang nasubo sa pahibalo sa kadagkoan sa Metro Cebu Water District (MCWD) nga pipila ka adlaw gikan karon mopahamtang sila og dugang usbaw sa presyo sa tubig.

Gikan sa P13.60 nga bayranan sa mata’g cubic meter (1,000 liters) nga tubig nga makonsumo niadtong dili kaayo kalas mogamit og tubig, gilaraw nga dugangan og kapin sa usa ka peso ang ilang bayranan mata’g cubic meter.

Nagpasabot nga kun ang usa ka pamilya mogamit og 15 cubic meters sa usa ka buwan, ang konsumidor hayan makabayad og dugang P25 sa iyang bayranan. Samtang nagbagutbot ang mga konsumidor dinhi sa lowland areas kay makagasto sila og dako nga bayad sa tubig, apan wala lang sila masayod nga kadtong mga pamilya nga nagpuyo sa bukid nagbayad og ka-lima ka pilo sa kantidad sa tubig nga ilang gigamit.

Samtang P13.60 ra ang bayranan sa mata’g cubic meter nga tubig dinhi sa lowland areas, sa ubang dapit sa upland areas ang tubig gibaligya og P75 ang matag cubic meter.

Nag-antos ang katawhan sa upland areas nga mapugos pagbayad og mahal kaayo nga konsumo sa tubig tungod kay ang MCWD napakyas man pagbutang og koneksyon sa tubig sa ilang mga dapit.

Ang mga pamilya sa upland areas nga nanginahanglan og tubig napugos pagpakonektar sa ubang tawo nga nagpahimulos pinaagi sa pagbaligya sa ilang tubig nga gipilo og kalima ang kantidad.