Pagpanalipod sa OFWs

Batan-ong Sugbuanon gidani og bugaw nga motrabaho isip guest relations officer (GRO) sa bay kahilayan sa Malaysia. Human lang sa pila ka adlaw, naghilak siyang nanawag sa iyang inahan nga gilawog siya sa mga tagduma ngadto sa hangtod lima ka lalaki matag gabii nga way bayad. Nidangop dayon ang inahan sa task force batok sa illegal recruitment nga naglakip sa Philippine Overseas Employment Administration (POEA) ug Overseas Workers Welfare Administration (OWWA).

Nilihok dayon ang task force sa Sugbo pagluwas sa batan-ong biktima. Giawhag nila ang inahan sa pagbalik sa ilang buhatan kun mahibalik na ang anak aron nga mapasakaan og kaso ang bugaw kay lisod na mang gukdon ang mga nakapahimus niya sa Malaysia.

* * *

Nahibaw-an na lang ni POEA Visayas Regional Center Chief Evelia Durato nga nahibalik na sa Sugbo ang batan-ong biktima. Apan niligid na lang ang daghang adlaw wa pakita sa ilang buhatan ang inahan ug ang anak. Nahugno si Durato kay di man sila makapasaka og kaso kun di mobarug ang biktima.

Inay maluya, gipasabot ni Durato ang iyang kaubanan sa task force nga igo na niya nga makatabang og mga biktima sa pagpahimus ug luwas nga mahibalik sa ilang yutang natawhan. Matud niya bahala na kun maareglo ang kaso, mas mahinungdanon nga buhi ang mga biktima ug makauban pa sa ilang pamilya.

* * *

Laing sakop sa task force, si Direktor Wilfreda Misterio sa OWWA Central Visayas, may tambag sa maapiki nga Overseas Filipino Workers (OFWs) sa nagkalainlaing kanasuran sa kalibotan: Mas dali silang matabangan kun makiglambigit dayon sa mga embahada o konsulada sa Pilipinas nga maoy labing duol nila, inay nga magpalaban una sa ilang pamilya o mga politiko dinhi sa ato nga igo ra sang makiglambigit sa lokal nga buhatan sa OWWA.

Matud ni Misterio gihatagan nila og numero sa embahada ug konsulada sa destinasyon nga nasud ang OFWs atol sa Pre-Departure Orientation Seminar (PDOS). Pipila hinuon sa mga kapamilya sa OFWs nga nidangop sa lokal nga OWWA nangreklamo nga gibungulbungolan ang mga reklamo sa OFWs sa mga embahada nga ilang gidangpan.

* * *

Nipasalig hinuon si Misterio nga mas paspas na sila karong makatabang sa maapiki nga OFWs. Daghang salamat sa modernong kahimanan sa komunikasyon ug sa bilateral agreements nga gisudlan sa gobyerno sa Pilipinas uban sa destinasyon nga mga nasud alang sa pagpanalipod ug pagpalambo sa interes sa OFWs.

Maong nitambag silang Durato ug Misterio nga angay’ng mosubay gyud sa tukmang proseso ang mga mangaplay og trabaho sa ubang kanasuran, hinaut nga panginabuhi ug di paglikay sa mga suliran dinhi maoy hinungdan, kinahanglang maghupot sa mga katakos nga gikinahanglan sa mga trabaho nga gi-aplayan ug angay’ng tinuon nga may pagtugot sa POEA ang recruitment agencies.

[email protected]