Nag-overpriced ang NFA?

Kun modayon ang dugang importation sa bugas karong tuiga gikan sa Vietnam, maalkansi ang atong nasud balig kapin sa usa ka bilyon ka pesos. Kini, matud ni Partylist Representative Neri Colmenares, gumikan sa overpricing.

Ang NFA nakahukom pag-import og one million metric tons of rice isip buffer stock gikan sa Hulyo hangtud Septembre karong tuiga. Sa ato pa, kun dili ta mamalit og bugas gikan sa gawas, waa na tay makaon nga bugas. Mao nga alang sa NFA gikinahanglan ang maong importation.

Midugang pagpahibawo si Colmenares nga sa atong gi-import nga bugas alang sa December 2013–March 2014 nga stock, naalkanse ang atong nasud o balig P521 million. Alkanse ang nasud, apan, tingali’g dugay nakaganansiya somewhere.

Ang US agriculture department mitaho nga ang market price sa bugas gikan sa Nov. 16 hangtud 22 sa miaging tuig, 377 USD per MT, o mas barato balig 84.39 USD kay sa atong napalit gikan sa Vietnam. Sa ato pa, klarong overpriced. Ngano man?

Gawas sa overpriced nga bugas, kining maong massive nga importation mobaha sa local market ug maka-kompetensiya sa local production panahon sa ting-ani sa mga bulan sa Abril ug Mayo.

Si Partylist Rep. Fernando Hicap, sa iyang bahin, misugyot: “We must rely on our own farmers. The best policy is to implement a genuine agrarian reform program and help our farmers produce all the rice needed by our country instead of depending on imports.”

Bitaw, kun nahimo kini nato panahon ni Marcos, nganong di man ni nato mahimo karon, subay sa matuwid na daan ni Noynoy?

* * *

Niay maayong balita.  Ang International Insurance leader, ang AIG, pinaagi sa ilang labaw, Daniel Abramson, mibutyag nga mo-expand sila dinhi sa Pilipinas, gumikan sa ilang nakita nga economic boom, among others, sa natad sa construction industry sa nasud.

Niya pa: “The ongoing expansion of the Philippine economy and growth in large-scale construction projects presents AIG with opportunities to expand its construction insurance portfolio in the Philippines.”

Dugang niini, ang America magpadala’g tulo ka trade missions nganhi sa Pilipinas, karong tuiga, gumikan sa kaikag sa mga dagkung kompaniya sa America pagbubo og dugang capital nganhi sa atong nasud.

Matud ni James MacCarthy, senior commercial officer sa US Embassy dinhi sa Pilipinas, ang ato konong nasud, nahimong attractive nga location sa langyaw’ng patigayon, gumikan sa good governance efforts sa atong kagamhanan, ang atong pagka-English speaking, young population, ug kasuod nato sa America.

“This is the most welcoming and gracious country in the world. You couldn’t find warmer place to do business. I think the Aquino administration is doing what it can,” nagkanayon si McCarthy. Labi na kun idayon ang Charter change, focusing mainly on the economic provisions of the Constitution.