EDITORYAL - Problema sa illegal drugs

Nagkadako ang problema sa ilegal nga drugas dinhi sa nasud. Gikan sa mga local drug syndicates nga nag-operate dinhi hangtud sa pagsulod na sa pipila ka mga international drug syndicates.

Kaniadto mga Chinese drug suspects pa ang kanunay nga mahisgutan, apan duna nay West African drug syndicate ug ning bag-o ang Sinaloa drug syndicate gikan sa Sinaloa region sa Mexico.

Timailhan kini nga ingon niini na kadako ang market sa illegal drugs dinhi sa Pilipinas. Senyales usab nga sayon lang sudlan sa mga susama ka dagkong sindikato ang atong nasud nga walay kukahadlok nga masakpan.

Tinuod duna nay daghang mga naaresto nga mga drug personalities, apan maihap lang sa tudlo kadto gyung dagkong isda, kun duna man dili pa gyud kaayo ilado.

Ang mga dagkong pangalan nga posibleng nalambigit sa negosyo sa illegal drugs idlas pa sa kasili tungod sa kadaghan sa ilang “kapit” pun-an pa sa mga hiwi nga law enforcers nga di diniyos sa ilang mga trabaho.

Dili trabaho sa yanong katawhan ang pagpangita og ebidensya batok niining mga gidudahang involved sa illegal drugs trade.

Ang mga awtoridad unta maoy mo-proseso, mo-validate, mo-execute sa pagdakop ug mosigurong lig-on ang kaso nga ipasaka batok sa mga nalambigit         niini.

Samtang nagkadaghan ang ‘imported’ nga sindikato nagkaanam usab kadaghan ang mga batan-ong nagumon sa illegal drugs, mga kabataang nakuryoso niining mga butanga.

Tungod niini di na maihap kun pila ka kaugmaon ang nausik kay inay sa mga eskuylahan, sa prisohan ang punta sa mga kabataan nga nangasaag.