Empleyado nga ipailawom sa preventive suspension, duna bay suweldo?

Dear Atty. Divine,

Nagtrabaho ko sa usa ka dakong kompaniya sud na sa lima ka tuig. Niadtong miaging buwan gipatawag ko sa among manager tungod sa giingong reklamo sa akong mga kauban batok kanako. Gipadad-an ko og memorandum sa management nga nagmando kanako sa pagtubag sa mga pasangil nga giluwatan sa akong mga kaubanan ug usa na niini ang giingong paggamit sa sakyanan sa among kompaniya alang sa akong personal nga mga lakaw. Matud sa among manager nga samtang magpadayon ang ilang imbestigasyon ila kong ipailawom sa preventive suspension. Ang akong pangutana attorney kun makatarunganon ba nga ila kong isuspenso bisan wa pa gani ko mapamatud-i nga sad-an sa pasangil batok kanako?

Kun ila kong i-suspenso aduna ba ako’y suweldo nga madawat niana attorney? Pila man sab ka adlaw mamahimo ko nilang i-suspenso? Hinaut nga imong mahatagan og katin-awan ang akong mga pangutana. Daghang Salamat. — Randy

Dear Randy,

Kun dunay preventive suspension sa mga empleyado ug opisyal sa gobiyerno, aduna sab niana ang mga empleyado sa mga pribadong kompaniya. Basi sa atong balaod, ang management o employer adunay katungod nga mosuspenso sa ilang empleyado samtang nagpadayon ang imbestigasyon batok kaniya. Kana maoy nalatid sa Omnibus Rules nga nagpatuman sa Labor Code of the Philippines nga nagkanayon: Sec. 8. Preventive Suspension. The employer may place the worker concerned under preventive suspension only if his continued employment poses a serious and imminent threat to the life or property of the employer or of his co-workers” (Rule XXIII, Book V). Basi usab sa desisyon sa Korte Suprema, gipasabot sab niini nga ang tumong sa pagpailawom sa preventive suspension sa usa ka empleyado mao ang pagprotihir sa property sa kompaniya samtang nagpadayon ang imbestigasyon ilabi na kun ang empleyado nga gi-imbestigar nakahulga sa iyang employer ug sa iyang mga kaubanang trabahante (Gatbonton vs. NLRC (G.R. No. 146779, January 23, 2006). Way suweldo nga madawat ang usa ka empleyado nga gipailawom sa preventive suspension apan kun masuta nga wa diay basihanan ang pagsuspenso sa maong empleyado aduna siya’y katungod nga modawat sa back wages. Basi usab sa balaod, ang period sa preventive suspension kinahanglan nga dili mosobra sa traynta (30) ka adlaw. Buot ipasabot nga human sa 30 ka adlaw kinahanglan nga patrabahuon na pagbalik ang empleyado apan kun ipadayon sa employer ang pagsuspenso kaniya kay wa pa matapos ang imbistigasyon, kinahanglan nga swelduhan na ang empleyado sa kompaniya kon payroll reinstatement ug kinahanglan nga hatagan na sab siya sa iyang mga benepisyo. ( Sec. 9, Rule XXIII, Book V, Omnibus Rules Implementing the Labor Code, as amended by Department Order No. 9, Series of 1997). Hinaut nga akong nahatagan og tubag ang imong mga pangutana. Thanks and God Bless. — Atty. Divine

Kun kamo adunay mga pangutana may kalabutan sa inyong problemang legal, ipadala lang sa Legal Corner sa Banat News or email sa [email protected] ug akong tubagon ang inyong mga pangutana matag adlaw’ng Miyerkules ug Domingo pinaagi ning atong column.