EDITORYAL - People Power

Matag tuig, dili gayud malimot ang mga opisyal sa kagamhanan pagsaulog sa makasaysayanong mga adlaw sa atong nasud. Apan daghan sa mga batan-on karon wala masayod unsay mga panghitabo nga naglambigit sa mao nga kasaulogan.

Sama karong adlawa, gisaulog sa tibuok nasud ang malampuson nga People Power Revolution nga gisalmotan sa milyon-milyon ka tawo didto sa Epifanio De Los Santos Avenue nga nakapatangtang ni kanhi Presidente Marcos sa katungdanan.

Kini maoy rason nga karong adlawa atong gisaulog ang “EDSA People Power” nga nahitabo niadtong 1986.

Kinsa ang angay’ng mabasol nga ang kabatan-onan karong panahona kuwang na kaayo og pagsabot ug wala g’yud makatugkad kun ngano nga gibalaan man sa nasud ang makasaysayanong mga adlaw.

Tingali daghan ang abtik kaayo nga mobasol sa kadagkoan sa tunghaan nga kuwang ang pagtudlo nila sa kabataan aron masayod sila sa mga panghitabo nga naglambigit sa mga mahinungdanong adlaw.

Daghan gani sa kabataan, bisan gani tingali ang mga dagko na og edad, kuwang sila og kasayoran mahitungod sa kaagi ni Dr. Jose Rizal, ang atong giila nga nasudnong bayani.

Kun aduna may pagkuwang ang mga magtutudlo nga wala makatudlo sa kabataan sa mahinungdanong mga adlaw sa nasud aron sila makatugkad ngano nga ato kining kanunay’ng saulogon, wala kaha magkuwang ‘sab ang mga ginikanan?

Sa moderno nga kahimanan karong panahona, ang pagtoon kabahin sa makasaysayanong mga adlaw sa nasud mahimong sayon na lang kaayo tungod sa internet.

Gigiyahan ba ninyo ang inyong mga anak niini?