Langyaw gustong mosagop sa anak sa iyang kapuyo

Usa ako ka OFW ug aduna koy live-in partner karon nga usa ka foriegner. Aduna sab ko’y usa ka anak sa pagkadalaga ug plano unta niya nga sagupon aron madala namo sa abroad ang akong anak. Ang akong pangutana atty. kun mamahimo ba niyang sagupon ang akong anak ug unsa may labing sayon nga paagi niini? Unsa man sab ang gidugayon sa proseso? Unsay una namong huhaton? Daghang salamat sa imong guidance. —Jenny

Dear Jenny,

Kun duna moy intention nga magminyo sa imong foreigner nga live in partner mas maayo nga magpakasal mo daan sa dili pa ninyo sugdan ang proseso sa adoption. Ubos sa atong balaod sa Domestic adoption, ang usa ka langyaw mamahimo nga mosagop og bata sa Pilipinas kun ang iyang sagupon anak sa iyang asawa o bana nga usa ka Filipino. Buot ipasabot nga kun magpakasal mong duha mamahimo na niyang sagupon ang bata ug mas sayon alang kaninyong duha. Ang Petition sa adoption adto na ipasaka sa korte busa aduna gyud kini hearing. Ang DSWD aduna say pagahimuon nga pagtuon labot sa tawong mosagop ug mohatag sab siya og rekomendasyon sa korte kun angayan bang i-grant ang adoption. Ang maayo ninyong buhaton karon mao ang pagbisita og abogado aron mahibaw-an kun unsay angayan ninyong andamon nga mga dokumento. Ang tibuok proseso medyo moabot gyud og tuig depende sab sa calendar sa korte. Hinaut nga akong natubag ang imong pangutana. Daghang salamat and God bless.

Alang sa inyong mga pangutana ipadala lang sa Legal Corner sa Banat News sa V. Gullas St. Cebu City ug akong tubagon ang inyong pangutana pinaagi sa akong column matag adlaw’ng Miyerkules ug Domingo.