Sige na lang bisan og nabahaw

Daghan ang mihangop sa mga Sugbuanon sa gitakdang pagbisita ni Presidente Benigno   Aquino III karong Martes sa pagtambong sa halandumon nga kasaulogan sa People Power Revolution sa EDSA sa tuig nga nagsugod sa pag-ulbo sa Pebrero 22, 1986 ubos sa pagpangulo nila ni kanhi Presidente Fidel Valdez   Ramos ug Senador Juan Ponce Enrile.

Matud pa nila nga bisan kun sa EDSA nahitabo ang malampuson nga People Power apan sa labing unang higayon  sa  Sugbo pagahimoon ang maong kasaulogan sa pag-ila usab sa gikatampo sa mga Sugboanon sa makasaysayanong panghitabo sa nasud nga Pilipinhon. Dugang pa nila nga matibhangan hinuon ang maong paghandum sa maong kalihokan kay ang pipila nga mga Sugboanon  nga maoy dako og gikatampo sa pag-ulbo sa halandumon nga EDSA  People Power  dili na man makatambong tungod kay daghan na man kanila ang mipanaw na ngadto sa laing kalibutan.

 Laing gihangop sa mga Sugbuanon sa pag-anhi sa Sugbo atol sa kasaulogan sa People Power mao ang pagbisita sa mga biktima sa bagyong Yolanda sa amihanang bahin sa lalawigan sa Sugbo sukad kini nahitabo sa Nobiyembre 8 sa miaging tuig .

Gitataw nila nga bisan kun wala makabisita ang pamuno nasud dihang bag-o pa nga nahitabo ang maong katalagman nga ilang gipaabot nga makatibhang sa gihambin nilang kagul-anan niadtong panahona maoy nakahatag kanila og dugang kusog ug kalig-on sa pagbarog og balik sa nalukapa nilang kahimtang ang nagkalainlaing sektor sa katilingban nga nagtinabangay sa paghatod og hinabang nga ilang nagamit sa matag adlaw nilang panginahanglan.

Giangkon nila nga gipaningkamutan hinuon sa kagamhanan nga katabangan gayod ang mga biktima sa bagyong Yolanda sa amihanang bahin sa lalawigan ug ang pagbisita ni Presidente Aquino daw nabuhi ang ilang paglaum nga mapaspasan pa sa pagpadangat ang gilauman nga dugang pang hinabang kay alang kanila sige na lang "sige na lang bisan og nabahaw."