Gidili sa simbahan, gisupak sa nanimba

Daghan ang gidili sa simbahan ngadto sa manimbahay. Gidili ang pag-usap og chewing gum. Gidili ang pagkao’g biskwit, pan, prutas, tsokolet ug uban pa. Gidili ang pag-inom og sopdrinks, tubig o ubang matang sa likido. Gidili usab ang pagsul-ob og dili desente o impormal nga sinina. Ug gidili usab ang pagpakigtabi sulod sa balay-alampoanan. Apan unsa bay gibuhat sa mga nanimba?

Sa miagi lang misa-nobena alang sa kapistahan ni Sr. Sto. Niño, ang sawog sa Pilgrim Center may nagkalainlaing plastic nga napasad: may mga basiyo sa mineral water, may sudlana’g prutas ug may mall bags nga nayatakyatakan sa mga tiil. Kini wala’y paghisgot sa mga putos sa karmelitos, bubble gum ug crackers nga gipangsuksok kilid sa lingkoranan.

Dili kay sa Pilgrim Center lang kini nahitabo. Halos sa tanang simbahan, gihimo sab kini sa mga badlungong nanimbahay. Ambot, nakaila pa ba kaha sila unsa ang matang sa maong dapit nga maoy ilang gibuhatan sa ingon? Kay kun ibutang lang pirme sa ilang utok nga ang simbahan usa ka balaang balay sa Diyos, segurado gayod nga dili gyud sila makaako sa paghugaw-hugaw niini,

Hunahunaa lang. Kun kita moinom ug mokaon sulod sa simbahan, sama ra nga gihimo nato kining restawran. Kun mag-usap ta’g chewing gum, daw gipakasama ta kining sinehan. Kun makigtabi ta sa atong tupad, mora’g gipakasama ta kining tiyanggihan.                  Ug kun makigbisobiso ta sulod sa simbahan, sama ra nga gipakapareha ni nato sulod sa diskohan, function room o ballroom. Ang simbahan, purely usa ka balay-alampoanan. Busa, angay lang irespeto, ibalaan ug ampingan nga di mabulingan sa tanang panahon.