Pagyamayama

Usa ka lalaki didto sa Lebanon nga hikit-ang mihalok sa imahen ni Mama Mary ug unya miingon: “She is no longer a virgin” gipaimbestigar karon ni Lebanese President Michael Sleiman.

* * *

Gipatawag ni Sleiman ang state prosecutor ug gimanduan nga susihon ang maong lalaki nga ginganlan og Ali Eitawi. Hikit-an sa TV  ang maong tawo nga mihalok sa imahen ni Mama Mary ug mihimo sa maong pulong.

* * *

Bisan si Sleiman dili Katoliko kundi usa ka Maronite Christian, wala kini mahimuot sa gihimo ni Ali Eitawa nga usa ka Arabo. Matud niya kinahanglan ang otoridad mohimo og nagkaigo nga aksiyon.

* * *

Mga 35 porsiyento sa populasyon sa Lebanon Kristiyanos. Mayoriya ang Muslim (65 porsiyento). Duna say pipila ka mga Baha’i, Buddhista, ug uban pa nga relihiyon. Ang Lebanon gud maoy usa ka multifaith society ug maoy labing liberal kabahin sa relihiyon sa Arab world.

* * *

Kita mo na. Bisan dili Katoliko ang presidente sa Lebanon, nasuko sa gihimo nga pagyamayama sa usa ka Muslim ngadto ni Mama Mary. Naay uban kanatong Pinoy nga makahimo sa pagdukmok sa imahen ni Mama Mary aron mapatigbabaw ang ilahang kaugalingon nga relihiyon.

* * *

SA LAING BAHIN ... Nakadawat kita’g pahibalo nga dunay usa ka pundok sa mga Kristiyanos nga Haponanon ang mobisita sa Pilipinas sa sunod nga buwan. Walay detalye ang maong pahibalo ... Belated Valentine’s greetings sa tanan natong bumabasa (sa Banat News) sa Kabisay-an ug Mindanao.