Aron magmalipayon

Adunay panultihon nga unsa man kasayon sa buhaton kun di ka makamao, lisud lang gihapon. Mao kini sagad ang atong namatikdan sama anang nagmaneho sa sakyanan nga wa na kadagan, mangita dayon og mekaniko. Nakapangalot sa ulo, kay igo lang gihikap ang baterya, niandar na. Sayon ra kaayo apan wala kahimo. Mao kini karon ang tema nga atong tukion.

Way kalainan sa sakyanan ang atong kaugalingong kinabuhi. Kinahanglan ayohon nato ang pagmaneho. Kita ang maayong modala, unsaon ug asa nato kini dalhon aron tahakon ang maayong dalan sa kalipay. Abtik kita sa pagkat-on nga masuhito sa tanang aberya o pagsulay sa kinabuhi. Di igo nga maantigo lang kitang mopadagan, basi’g abuton sa kaluya kay nahitumpawak sa libaongon nga dalan. Angay usab nato ipukos ang atong hunahuna aron gayud kita molampos.

Samtang gapanaw ning walog sa kinabuhi, angayan lang atong dasigon ang kaugalingon nga kanunay magmalipayon, aron ang nasinating kapait sa kinabuhi, mapapas nga di mo lang damhon, kay nabatyagan mo na ang tiunay nga kalipay. Apan unsa man gayud ang tamdanan aron kita magmalipayon?

(1) Pasidunggi ang kaugalingon mo – dili na kinahanglan nga ipanghambog nga kita hawod o maayo og abilidad. Pahinumdomi  ang kaugalingon nga may dako kang kapuslanan. Nakahimo ka’g kadungganan nga angay ikapasigarbo.

(2) Pangitaa ang labing nindot diha kanimo – sultihan ang kaugalingon nga di ka basta nga tawo tungod kay ikaw adunay talent nga may mahimo nga dili mabuhat sa uban. Hatagi’g inspirasyon pinaagi sa paghimo’g mapuslanong butang

(3) Dawaton ang kaugalingon–  mapasalamaton  kun unsay mga butang nga anaa kanimo. Angay usab dawaton, nga di masina nga may mga tawo nga  molabaw pag abilidad nimo. Di sab tamayon kadtong mga anaa sa ubos mo.

(4) Kanunay magkat-on – dili pa hingpit ang kahibalo nga atong nabatonan. Padayon sa pag-ugmad sa mga bag-ong butang. Makadugang kini sa kompiyansa mo ug labi pa silang mobilib ug dayegon ka sab sa kahalapad sa imong kaalam.

(5) Kinahanglan magpositibo – likayan ang unsa o kinsa man nga mopaubos sa pagkatawo mo. Maoy pakig-ubanan ang mga tawo nga kanunay positibo sa hunahuna ug sa buhat, aron may inspirasyon ka nga kanunay malipayon.