Kiat nga drayber

Kun duna pa ko’y Temporary Operators Permit (TOP), natudloan na unta og leksyon ang drayber sa PUJ nga danghag kaayo sa iyang pagmaneho nga sagad makamugna og aksidente.

Atensyon sa tag-iya sa PUJ nga magbiyahean sa Labangon, 12-I ang rota ug ang plaka GVL-897. Kining imong drayber nga kiat kaayo mopadagan, diriyot g’yud makabag-id sa akong sakyanan.

Nagsubay ko sa Natalio Bacalso Avenue kagahapon sa buntag ug akong gikaampad dapit sa tuo nga bahin ang PUJ nga gimaneho sa kiat nga drayber.

Pag-abot namo dapit sa eskena Tres de Abril, mi-overtake ang PUJ nako pinaagi sa pagkawat og agianan nga akong gisubay, dayon mipasirit ug pag-abot niya sa unahan, mibalik na usab pagsulod sa linya nga iyang gisubay sa wala pa siya mo-overtake.

Kun dili pa ako abtik nga mitamak sa brake, nagkasingki na unta ang duha namo ka sakyanan tungod sa kadanghag sa mao nga drayber. Nagdali tingali kadtong mao nga drayber kay sa unahan aduna siya’y pasahero nga gihunongan.

Gipasiklapan nako ang dagway sa mao nga drayber, nakapanglingo-lingo ko ug miingon nga mao diay nga abusado kaayo momaneho. Dili na lang nako dugangan pa.

Wala may nagdili nga mo-overtake sa sakyanan apan kanang husto nga pagkahimo. Diha ra siya sa akong kilid ug gisirad-an ra dayon niya ang akong agianan.

Pagka-ignorante sa mao nga drayber sa balaod sa pagmaneho og sakyanan. Ang angay tingali kaniya nga pahunongon na’g drive ug mangita’g laing trabaho. Tabangan pa nako kay may nanginahanglan og kargador sa pantalan.

* * *

Ambot kun kanus-a kaha ibalik sa Land Transportation Office (LTO) ang deputation sa mga LTO agents. Mora’g paniid nako wala man ‘sab hingusgi ni LTO Acting director Arnel Tancinco ang pagrekomendar nga mabalik na ang mga deputized agents.

Apan bisan pa og walay LTO agents apan abtik lang unta ang mga CITOM traffic enforcers nga mopatuman sa balaod, mapitol man g’yud unta ang mga badlongong drayber. Unsaon nga magmika man usahay ang uban niining mga traffic enforcers sa CITOM. Ang uban gani makit-an nako nga magtinagorha sa usa ka dapit ug magsigi og estoryahanay.

Kaduha na ka higayon nga magtupad lang sa pagtindog kining duha ka traffic enforcers sa matag higayon nga moagi ko diha panahon sa buntag. Nasiguro ko nga managlahi ang dapit diin sila madistino apan nanulong ra g’yud og tabi ang usa. Gireport na nako kini kang Joy Tumulak nga maoy ilang operations officer sa CITOM aron mapasidan-an sila nga likayan ang sama nga binuhatan.