May mapriso ba kahasa mga sinumbong?

Mao diay nga kasagaran sa mga batan-on di gustong  matiguwang tungod  kay  sa pundok  sa mga  senior citizen, pipila ra ang way kunot.

Ini’g abot sa senior og 80-85 anyos  tagsa ray tanos, kay kasagaran piko na, luya na molakaw ug  sa laktud sama  sa buwak, lawos na. Busa  ang mga  batan-on  karon  kusog kaayo  manaway sa maguwang  nila  og  edad  o  kaha  sa  mga  tiguwang  gumikan  sa  deformation  o kausaban  sa dagway  niini.

Kun  labi  kang  guwapa  sa bata  ka  pa, ini’g katiguwang  nimo, di kana  guwapa kay “tiguwang” na’y  itawag  kanimo.

Busa  kun  hinawayon ka  sa maguwang  ug  edad  kanimo o  sa  mga  tiguwang, dimalas  ka  kay di ka gustong  matiguwang, gusto ka nga papahuwayon  ka  sa Ginoo  sa 40-50 ang imong edad, impas ka.

* * *

Ang ukay-ukay dako kaayo og  gikatabang  sa  mga  kabus, gumikan sa presyo  niini  nga  maabot  sa tanan.

Kun hilig  ka  og  imported  nga senina, karsones  ug  sapatos, di ka magmahay kay  daghan  ka  nga  mapilian sa ukay-ukay  nga  imong  magustohan.

Kasagaran  usab  sa  mga  ukay-ukay  nga  mga  muwebles, appliances, mga   senina, sapatos  ug  uban  pa  gigamit  karon  sa mga  kuwartahan  ug ingon man sa kabus.

Kini tungod  kay  ini’g gamit nimo mas molahutay pa og  dugay  ang  iyang materyales  kay  sa mga lokal  nga  mga  baligya nga  usa, duha, ug  tulo ka gamit, guba na.

* * *

Ang senate hearing  sa senado kagahapon  giisip ni Sen. Miriam Santiago nga labing dako, mahinungdanon ug makasaysayanon  nga  hearing sa tibuok  kasaysayan  sa Pilipinas  bahin  sa  PDAF  scam sukad-masukad.

Apan  nakurat  ang  maong  senador  kay  sa iyang  pag-abot, siya’y  ika-siyam  sa 24  ka  senador  nga  naminaw sa mga testimonya sa  mga testigos  sa P10 billion pork barrel fund scam.

Ambot daghan  man  kunong  magbabalaud  nga  nalambigit  sa maong  kawat  sa  buhis  sa katawhan,  wa  ba  kaha  magduda  ang  senador  nga  kadtong  wa  motungha, nalambigit usab  sa  maong  kawat.

Sa iyang  pamahayag  gikutlo  ni  Sen. Santiago ang  baruganan  sa  Korte  Suprema nga  “denial is  a weak kind of defense,”  ug mas motuo pa  ang  Korte  Suprema   sa pamahayag  sa mga  saksi  nga  apirmatibo kay sa mga sinumbong  nga kanunay  lang  negatibo. Sa unang  batch  nga  gipasakaan  na’g  kiha, may 38 ka sinumbong  nga  naglakip  sa  tulo  ka senador , unya may  lain  pang  mga batches  nga  pasakaanan  pa  og  kiha.

Hinuon , nagbitay  ang  mga  pangutana,” may  mapriso kaha sa  mga  sinumbong?”