Sige lang bisa’g sakit

Natural sa tawo nga bisan sa hunahuna pa lang basta sakit moigking gayud. Bation nag kahadlok bisa’g wala pa mabatyagi, kay nasayud nga may negatibo kining epekto kaniya. Hinuon, adunay mga sitwasyon nga tungod kay nabansay na sa kaisog nahimong kublan nga di na bation og kasakit. May pipila usab nga giluom lang nga giantus ang kasakit, sa pagtuo maalim ra kini ug malampasan. Sa uban giisip kining pagsulay, kay wa siya’y kapilian aron modaug sa kinabuhi.

Agi’g dugang handuraw sa kasinatian, ug paghatag mas mapuslanong giya sa kinabuhi ug lawom nga pamalandong, ato kining panaminan sama ini….

(1) Ang usa ka boksidor, dili lalim ang sinukliay sa kumo. Gibansay pag-ayo ang kaugalingon aron moagwanta sa sakit sa binukbukay. Kun dili kalahutay sa sakit tungod sa bun-og, aw mapakyas siya sa pag-angkon og kadungganan, gawas sa ganting salapi nga madawat, nga ang kantidad giagad sa kabantog.

(2) Ang sakit nga may hubag, dili lalim ang mahatag nga kahasol pamation aron mahupay ang gibati mo, mas imo gayud agwantahon ang mas sakit nga tagamtamon nga mao ang paglugit o pag-opera pagkuha sa hinungdan sa sakit.

(3) Ang kalisod sa kinabuhi, sakit usab nga dili mo mailarawan kun unsa kini kasakit. Usahay kun maugtas ug mawad-an og paglaum, modangop na lang sa paghunos sa kaugalingon. Apan kun gusto ka pang madawat ang ganti o ang katumanan sa pangandoy mo, mas imo pang lugwayan ang giantos nga kasakit.

(4) Adunay sakit kaayong tagamtamon apan gihimong puhonan ang pailob ug pagmalasakit aron ulayon ang kaugalingon sa katarungaron nga mahimong ikapasigarbo nga matinuohon sa kahitas-an. Nga maoy gipangandaman ang utlanan nga moabot ang kasakit nga maalid-an sa way kinutuban nga kalipay.

(5) Ang babayeng mabdos, sakit bisa’g nasayud ikamatay kining ikatumbas sa kinabuhi, mora’g inighuwas sa bation dili gyud motagam. Mangandoy pa nga tagamtamon pag-usab ang kasakit bahala na, tungod kay may sensayon kining batyagon nga makapahigam nga katkaton ang kinapungkayan sa himaya.

Busa sige lang ayaw kahadlok ni katalaw sa sakit, kay kun nasinati mo kini sama ra gipanday mo nga lig-onon pag-ayo ang kinabuhi nato nga dili basta masukamod ni mahunlak ang dakung kapuslanan o katuyoan sa atong kinabuhi.