EDITORYAL - 7-lakes sa San Pablo, unti-unting sinisira

KUNG hindi pa nagpalabas ng statement ang Germany-based Global Nature Fund (GNF) na ang 7-lawa sa Laguna ay unti-unti nang nasisira, hindi pa kikilos ang mga namumuno sa nasabing siyudad para tingnan ang talagang kalagayan ng mga lawa. Paano kaya kung wala ang GNF? Maaa-ring hindi kikilos ang mga namumuno sa San Pablo o ang gobernador ng Laguna para asikasuhin ang nagbabantang pagkasira ng mga lawa. Mula nang ihayag ng GNF na nanganganib ang 7-lawa sa pagkasira, kanya-kanyang paliwanag ang mga opisyal sa San Pablo ukol sa nangyayari sa lawa. May nagsabing “unfair” naman daw ang sinabi ng GNF. Hindi naman daw totoong nasisira ang lawa. Ang ilan ay nagsabing bibigyan ng solusyon ang problemang nakaamba sa mga lawa.

Ang pitong lawa ay ang Sampaloc, Palakpakin, Calibato, Bunot, Yambo, Pandin, Muhicap. Ang Sampaloc ang pinaka-malaki sa lahat nang lake. Maraming isda na karamiha’y tilapia ang nakukuha sa mga lawa at pinagkukunan ng ikabubuhay sa lugar.

Ayon sa GNF, ang Sampaloc ang pinaka-delikadong masira. Halos mapuno na umano ng “illegal fish pens” ang Sampaloc lake. Ang matindi pa, at pinatotohanan din ng mga taong nakakakita sa mga nangyayari sa mga lawa, ang mga dumi ng squatters na nakatira sa pampang ay itinatapon mismo sa lawa. Araw-araw umano ay nagtatapon ng basura sa Sampaloc lake. Lalo pang dumadami ang basura sapagkat parami nang parami ang squatters sa paligid ng mga lawa. Hindi umano kayang pigilan ng nangangasiwa sa mga lawa ang pagdagsa ng mga “illegal settlers”.

Hindi lamang mga namumuno sa San Pablo ang nararapat kumilos sa nakaambang pagkasira ng 7-lawa kundi pati na rin ang Laguna Lake Development Authority (LLDA). Sila ang responsable para mapangalagaan ang lawa sa mga taong sakim at walang pagmamalasakit sa pinagkukunan ng ikabubuhay. Nararapat kumilos ang LLDA upang masagip ang 7-lawa sa tuluyang pagkasira. Pero kailangan ang tulong ng mga taga-San Pablo para magawa ito. Pagtulungang wasakin ang illegal fish pens at higpitan ang mga squatter sa pagtatapon ng kanilang dumi sa lawa.