P6,000 na lang karong tuiga

Una sa tanan, atong ipasabot dinhi, sa ato nang gibalikbalik dinhi ning atong lindog ug sa atong tulomanon sa dyRC: Senior Citizens Hour, nga kining cash assistance gikan sa city hall usa kini ka gasa … gift. Pahalipay ug pagpasidungog kanatong mga senior citizens pag-ila, among others, sa atong natampo kanhi pagpaugmad sa atong nasud … sa atong contribution in nation building.

Sa ato pa, tungod kay gasa, daku ang atong pasalamat … ug wala kita’y katungod pag-demanda pila’y ilang igasa nganhi kanato, ug unsaon nila pagpahigayon ang maong gasa.

Gisaaran kita’g P12,000 cash gift sugod karong tuiga. Ug ato nang madawat sa atong pagsaulog sa Valentine’s Day ang balance of P2,000 sa miaging tuig ug advance of P1,000 sa P6,000 alang sa karon nga tuig.

Ihatag gihapon ang P12,000 apan, ang katunga niini, dili cash kundili in kind. Sa ato pa,  in the form of projects and services. Mga services nga madapat gayud direktamente kanatong mga senior, labi na niadtong mas nagkinahanglan sa maong mga matang sa pag-alagad.

Sa ato nang nahisgutan dinhi ug sa atong tulomanon sa radio, dili automatic ang tanang senior citizens ning dakbayan, ang nagkinahanglan sa cash assistance. Gani, ang uban kanato, daghan kanila, ang waa gyud magkinahanglan niini … sa ato pa, usik ang maong cash assistance nga mahipunta ngadto sa waa magkinahanglan. 

Ug, at the same time, daghan usab kanato ang mas nagkinahanglan, apan, ang ilang madawat sama ra sa madawat sa waa magkinahanglan. Unfair, di ba? Ngano man, pananglitan, nga ang usa ka bedridden nga senior citizen, pareha ra ma’g madawat sa usa ka maayo’g lawas, ug adunahan nga senior citizen?

Ug kun atong i-audit ang tibuok cash assistance nga gipanghatag, diin man ni paingon? Unsa may gigastoan niini? Napahimuslan ba gyud kini sa mas nagkinahanglan nga senior citizen? Did it directly benefit the poor and sickly senior citizens?

Mao nga alang nako, dili nato ihatag ang tibuok nga cash assistance, kundili, ato kining ihapak ug idapat sa mga services, sama sa gihimo sa mas adunahan nga Makati City nga hangtud karon, P2,000 ray cash gift, apan, daghan kaayo sila’g mga services nga kapahimuslan gayud direktamente sa mga senior citizens.  Usa ra ang kanunay natong gi-example dinhi. Ang tipik sa P6,000 cash, mahimo nga atong itukod sa geriatric ward, kompleto sa kahimanan, mga doctor ug nurses, ug mga tambal – exclusively alang lang gyud sa mga senior citizens.

Pagkakaron, waa man ni nga matang sa serbisyo, bisan tuod og gi-require kini sa Expanded Senior Citizens Acts of 2003 ug 2010. Usa lamang kini sa mga benepisyo nga atong ma-availed of, gikan sa P6,000 nga “in kind.”

Karong bag-o, ang Parañaque City, mihatag usab og cash assistance ngadto sa ilang mga senior citizens. Pila man? P500 birthday gift, P500 Christmas gift. Sa ato pa, P1,000 ra tibuok tuig. Nalipay sila, waay reklamo. Ikaw?

(Paminaw sa Senior Citizens Hour, 5:00-6:00 pm, matag Sabado, DyRC, 648 kHz, Tels. 4125249, 4125298.)