Away sa upat ka higante
Duha sa upat ka higanteng kompaniya nagsaulog karong semanaha: Ang Facebook nagsaulog sa iyang ikanapu nga sumad sa pagkatukod ug nisaad nga mas mabungahon pa ang sunod nga napu ka tuig; samtang ang Microsoft nakatudlo na og bag-ong chief executive officer, si Satya Nadella, taga India, kinsa nipasalig nga sagupon niya ang mobile ug cloud-first nga sistema.
Ugma sa Internet ang giingong girepresentahan sa Facebook. Samtang gipasanginlan ang Microsoft nga maoy dagway sa kagahapon. Nga iyang gidominahan pinaagi sa monopoliya sa Windows ug Microsoft apps sa personal computers (PC). Nga karon hingpit nang nahulga tungod sa nagkapaspas nga internet connection nga mahimo na ang bisan unsang gimbuhaton sa desktop kaniadto pinaagi sa cloud computing.
* * *
Laing higante sa teknolohiya, ang Google, maoy nipukan sa pag-monopoliya sa Microsoft sa panguwarta sa desktop pinaagi sa iyang mas maayo ug labaw sa tanan libre nga web apps sama sa Gmail, Google Drive, YouTube, Maps, Picasa ug uban pa. Ang determinasyon sa Google pag-abli sa Internet sukwahi sa pagpangandado sa laing tulo ka higante.
Ang ikaupat nga higante sa teknolohiya, ang Apple, maoy labing serado. Di kang kabutang og apps sa iPhone, iPad, iPod ug Mac kun di moagi sa ilang iTunes. Apan silay labing adunahan karon kay silay nakauna sa merkado sa tanang upat nila ka produkto.
* * *
Apple maoy labing unang nakahimo sa PC. Apan mas dako og halin ang nisunod nga Windows nga, segun ni anhing Steve Jobs sa Apple, kinopya sa orihinal niyang operating system. Ang gihimo ni Bill Gates sa Microsoft mao ang pagpamaligya sa Windows ug apps ngadto sa tanang karibal sa Apple nga tighimo og PCs.
Nga gisunod sa Google pinaagi sa pagpanghatag sa iyang Android nga operating system sa mobile phones. Maong nalupig dayon ang mas mahalon nga iPhone ug iPad. Wa motagam ang Apple sa orihinal nga atraso pagtak-op sa Mac. Apan silay kinadak-an og ginansiya kay maoy naghimo sa hardware ug software.
* * *
Mapalit unta sa Microsoft ang Google. Apan wa kakita si Gates og kuwarta sa web search. Makauna sab unta ang Google sa Facebook pinaagi sa Orkut ug Twitter, umaabot nga higante kun kamao nang manguwarta, pinaagi sa Dodgeball. Apan silang Larry Page ug Sergey Brin sa Google kumbinsido nga ilang algorithm maoy labing epektibong motigom sa tanang kasayuran sa kalibotan.
Nga gisalikway ni Marck Zuckerberg sa Facebook. Kinsa nimatuod nga ang personal nga mga relasyon mas importante kay sa mga makina. Uwahi nang nakamatngon ang Google. Ilang pangopya sa Facebook nga Google Wave ug Google+ napakyas. Uban ang 1.2 bilyones ka sakop, gitak-opan sa Facebook ang iyang kaugalingon gikan sa crawlers sa Google.
Mahimong magpabiling pulos malambuon ang upat ka higante. Apan di ni garantiya nga di sila magpinatyanay.
* * *
- Latest
- Trending
