Naabtikan ni Basyang

Daghang salamat sa liderato nilang Cebu Governor Junjun Davide ug Acting Cebu City Mayor Edgar Labella, way kalibog nga nitumaw may klase ba o wa sa adlaw nga gitakdang moigo si bagyong Basyang sa Sugbo. Pila ka oras sa wa pa motugpa sa yuta ang bagyo, gimando na nila ang pagsuspenso sa klase sa tanang ang-ang sa tanang eskuylahang publiko ug pribado.

Bisan ang Dakbayan sa Lapu-Lapu, kansang mayor nisukwahi sa nangaging mga pahibawo ni Davide, way laing kapilian. Kay si Direktor Carmelita Dolangon sa Departamento sa Edukasyon (DepEd) sa Central Visayas sayo sab nga nipahibawo sa pagsuspenso sa klase sa mga eskuylahan sa Opon.

* * *

Nga wa diay kinahanglana.  Salamat sa talagsaong kapaspas sa lihok ni Basyang. Nitugpa sa yuta sa alas-7 sa gabii niadtong Biyernes, mas sayo og upat ka oras kay sa nahaunang gipangagpas nga landfall sa alas-11 sa gabii.

Nagdalidali pagpahibawo sa mga Sugbuanon si Direktor Oscar Tabada sa Philippine Atmospheric, Geophysical and Astronomical Services Administration (Pagasa) sa Kabisay-an nga inay sa buntag sa Sabado mas sayo ng moabot sa Sugbo si Basyang sa ala-una pa lang sa kadlawon. Human sa gitakdang pagtugpa sa Panaon Island sa Southern Leyte sa alas-9 sa gabii ug sa Ubay, Bohol sa alas-10 sa gabii.

* * *

Apan bisan ang inusab nga pangagpas ni Tabada wa kaapas sa ka kiat ni Basyang. Alas-9 pa lang sa gabii niadtong Biyernes nagsugod na paghuros ang kusog nga hangin di lang sa habagatang Sugbo, nga maoy gitakdang tugpahan sa bagyo, kun dili ang tibuok isla sa Sugbo.

Gipangutana nako si Direktor Tabada kun niabot na bang bagyo. Nipasabot siya nga layo pa ang kinakusgan nga hangin ni Basyang ug busa mahimong molungtad ug mas mokusog pa ang hangin hangtod sa kadlawon sa Sabado. Tuod man, nagkakusog ang hangin ug may mga tigpaminaw na sa DYAB nga nipahibawo nga may nangatumba nga mga punoan sa kahoy sa Naga City ug may nanglupad nang mga atop sa kabalayan sa bukirang bahin sa Dakbayan sa Sugbo.

* * *

Dihang nihunong ang huros sa hangin, nidapit ang akong asawa nga mangatug na mi aron makalahutay pagbantay sa among bay kun moabot na si Basyang. Dayong piyong pasado alas-10 sa gabii nikusog ang hangin gikan na sa laing direksiyon.

Pagmata nako, linaw ug hayag na. Nilabay na si Basyang sa Sugbo ug sa Negros ug nagkaduol na sa Panay. Init kaayong adlaw apan pabiling suspendido ang mga klase ug gigakotan ang mga barko kay ubos pa sa Signal No. 2 ang Sugbo. Maayo tingaling kumbinsihon ni Tabada ang iyang kadagkoan sa Pagasa nga ang sistema paghimo og forecast matag unom ka oras angay’ng mas paspasan pa. Salamat sa pagpakauwaw ni Basyang nila.

* * *

Email:[email protected]