Unsay gikahadlokan ninyo?

Ang merkado gitukod aron kabaligyaan og bisan unsa nga atong gikinahanglan, dili kay puy-an kini og mga tawo.

Ang pagkasunog sa Warwick-Barracks nga kaniadto usa ka merkado apan gihimo na nga pinuy-anan ingon sa sulagma nga maghatag og higayon ni Mayor Michael Rama nga ibalik ang kahapsay sa maong dapit.

Daygon g’yud nako si Mayor Rama kun did-an na niya nga puy-an lang gihapon og mga tawo ang Warwick-Barracks, apil ang ubang kamerkadohan dinhi sa dakbayan.

Nakabantay ra ba ko nga ang Freedom Park anam-anam usab nga misundog sa Warwick-Barracks nga gipuy-an na usab sa mga tawo nga gihatagan og higayon nga makapaninda.

Bisan og ang mayor estrikto nga momando nga dili papuy-an ang kamerkadohan apan dili ipatuman sa kadagkoan sa Office of City Markets ang kamandoan, wala g’yuy mahimo.

Busa anaa sa abaga ni Market Administrator Raquel Arce nakapatong ang katungod sa pagpatuman sa mando sa mayor. Sayud ko nga kini’ng higala nako nga si Raquel andam motuman og sugo.

Hinoon, nakabantay lang ko nga usahay mag-ukon-ukon lang ‘sab ilabi na og makabantay nga ang target sa iyang trabaho nakasandig og mga ilado nga tawo.

Ang gipasabot nako mao ang kapakyas ni Raquel paghawan sa ubang mga karsada gikan sa mga vendors nga nakabalda pag-agi sa mga sakyanan diha sa dalan Legaspi.

Kining mao nga mga tindera nag-ukopar sa aseras sa dalan Legaspi kilid sa Barangay Hall sa Santo Niño ngadto na sa atubangan sa usa ka banko.

Nakasabot ko nga ang pagbadlong sa mga tawo kaniadto nga nagpuyo na sa Warwick-Barracks lisud na usab kaayo nga gimbuhaton alang kang Arce.

Dili pa si Arce ang market administrator kaniadto nga nagmika lang ug gipasagdan ang mga tawo nga magtukod na og balay sa Warwick-Barracls.

Apan kining mga tawo nga anaa na maninda sa dalan Legaspi sayon ra kini sila himoan og operation sa mga sakop sa Prevention Restoration Order and Beautification Enhancement (Probe).

Alang kanako, mando ra g’yud ang kuwang. Mga isog kaayo ning sakop sa Probe kay ang uban gani kanila magtakin-takin pa man og posas nga sa ato pa maayo sila manakop.

Bi, ipakita ang inyong abilidad. Hagit kini nako sa akong higala nga si Raquel ug ni Mayor Mike Rama nga ipatuman ang balaud pinaagi sa pagtul-id sa hiwi.