Imahen nagmilagro?

Nakurat ko pagkadungog nga dunay imahen ni Santo Niño nga nagmilagro kuno didto sa usa ka barangay sa dakbayan sa Lapu-Lapu.

Sigun sa tabi-tabi misulti ang imahen sa Santo Niño nga napalgan sa mga nagduwa-duwa nga mga bata didto sa baybayon sa Sitio Saac, Barangay Mactan.

Tungod niini, gihugopan sa gatusan ka tawo ang mao nga imahen. Ang uban sa mga tawo nga nag-ambahan pagsud-ong og pagyukbo sa imahen gikan sa lagyo nga mga lugar nga nakadungog sa “milagro.”

Akong klarohon nga idolo nako si Santo Niño. Gani giisip nako nga siya ang manluluwas sa akong kinabuhi dihang naligsan ko ug dakung sakyanan kaniadtong 1995.

Kaniadto, kanunay ko nga magdala-dala’g armas apan karon gold-plated nga gamay’ng imahen ni Santo Niño ang kanunay nako nga gidala-dala isip akong manluluwas.

Apan tambag nako sa mga tawo nga ayaw kaayo kamo pagtoo dayon sa giingong milagro. Dili na kay una kining higayon nga dunay ipatoo nga imahen nga nagmilagro apan sa kauwahian nasakpan nga dili tinuod.

Wala ko magpasabot nga dili tinuod nga nagmilagro ang imahen nga napalgan sa baybayon sa Barangay Mactan. Apan ayaw lang dayon ihurot ang inyong pagtoo.

Kaniadto, dunay usa ka imahen diha sa dalan Sikatuna nga gikataho usab nga nagmilagro. Duol ra kini sa akong gipuy-an mao nga gihimoan nako og pakisusi.

Sa ngadto-ngadto nahibaw-an nga ang mahuyang nga maoy giingon nga gimilagrohan sa santos diha sa Sikatuna, didto diay mipalit sa imahen sa baligyaanan og mga imahen kilid sa Santo Rosario Church.

Napalpak ang binuang kay dunay tawo nga mialsa sa imahen ug mihiling niini. Didto nakit-an nga duna pa’y “tag price” ang imahen.

Kapin sa 20 ka tuig na ang nakalabay, duna ‘say imahen sa Santo Niño nga giingong nagmilagro ‘sab didto sa Villa Bulsita, sakop sa Barangay Bulacao.

Magtubod kuno ang tubig sa lawas sa imahen. Daghan ang moadto ug mopahid sa tubig kay gitoohan nila nga tambal kini sa ilang mga sakit. Sa ngadto-ngadto nahilom ra ang giingong milagro.

Ang tinuod, kun duna go’y mga taho sa milagro, daghan ang manghatag og kuwarta. Nasayud na kamo unsay akong gipasabot ug mao nga angay kita nga magbantay.