Sinulog sa Sugbo

Sa sinugdanan gyud, gihinganlan ni Sir Boy Odilao ang karon bantug na nga Sinulog festival nga “Sinulog sa Sugbo.” Kini aron malahi ang sinulog sa Cebu sa ubang sinulog nga una nang gisaulog sa ubang dapit sa Kabisay-an.

* * *

Duna man gu’y mga sinulog festival sa Negros Occidental ug sa mga lalawigan sa Panay. Duna sad sinulog sa Carmen (Cebu) nga una pang namugna kay sa sinulog sa dakbayan sa Sugbo.

* * *

Naay mga misugyot nga ibalik ang original nga taytol sa kasamtangang Sinulog Festival nato sa dakbayan ngadto sa “Sinulog sa Sugbo” No, dili aron makadani og minilyon pa nga mga bisita kundili kahatagan sad og dungag pasidungog ang Sugbo.

* * *

Sama ba sa Cebu Pacific Air ni Sir John Gokongwei. Iya kuno kini ginganlan nga Cebu Pacific isip pasidungog sa Cebu diin siya unang nagsugod sa iyang pagkatubigan.

Sama sad sa Cebuana Lhuillier Pawnshop diin bisan asa ginganlan na kini nga Cebuana.

Sa tinuod lang, bisan pa sa kabantug na sa atong Sinulog Festival duna pay mga tagagawas sa Sugbo nga mangutana pa kun asa nga Sinulog ang gihisgutan sa pipila ka mga tawo.

* * *

SA LAING BAHIN ... Praise the Lord nga gihatagan niya’g maayong panahon atol sa prosisyon solemni ni Sr. Sto. Niño ug atol sab sa Sinulog grand parade. Daghang salamat sa atong mga suking magbabasa sa tibuok Sugbo.